Den e di dos dialogo a presenta ehecucion di e maneho di traspaso di permiso y oportunidad igual

E reunion aki ta continuacion di e dialogo riba dos Decreto Ministerial (MB) cu ainda no a bay na vigor.

E prome MB, den cuadro di transparencia, a enfoca riba puntonan di interes general, en particular crea oportunidad igual pa tur cu ta desea di bin na remarke pa un permiso di taxi. E di dos MB ta cu lo aumenta e capacidad permisibel di asiento den vehiculo di taxi, di 5 pa 7 asiento.

Minister Arends a sigura e taxistanan cu e la bin pa scucha nan y presenta su punto di bista pakico e cambionan den e decreto ministerial ta necesario. E dos puntonan primordial ta pa oportunidad igual y combati corupcion.

Un di e preocupacionnan tabata e reglamento di pensioen pa taxistanan, pa esaki Minister a tuma e iniciativa riba su mes pa acerca pensioenfonds nan pa wak ki posibilidad tin pa e taxistanan. E posibilidad tey pero taxistanan mester organisa nan mes y regla nan situacion financiero. Un prome paso ta pa inscribi na Camara di Comercio.

Despues di e prome sesion cu e taxistanan cu a tuma luga diamars 6 di augustus, Minister a presenta concepto pa e ehecucion di su maneho relaciona cu traspaso di permiso, incluyendo interes general y oportunidad igual pa ciudadanonan cu kier yega na remarke pa un permiso.  

Minister di Transporte tambe lo yuda y facilita esnan doño di un permiso di taxi te unda ta posibel, pa yega na areglonan financiero responsabel, incluyendo pensioen, seguro y cumplimento cu nan deber fiscal.

Minister Arends ta reafirma su compromiso pa garantisa oportunidad igual den transporte publico. E maneho tambe lo dedica atencion na empodera e posicion di hulpchauffeurs y cambio den un sistema tradicional cu a trece cu ne privilegio pa un grupo cu no necesariamente ta sirbi interes general. E puntonan di ehecucion di e maneho, ta pa evita cu ta afecta e "vergunninghouder" di forma iresponsabel.

Dia 21 di augustus tin e siguiente dialogo programa cu e representantenan di e diferente gruponan di taxi.