Delegacion di La Guajira a bishita Aruba pa fortalece lasonan cultural
ORANJESTAD – Recientemente, riba invitacion di Stichting Rancho, un delegacion di La Guajira a participa activamente den e programacion di conmemoracion di Dia di Emancipacion di 1 di juli.
E fecha aki tambe a keda proclama como dia nacional, unda ta conmemora abolicion di sclavitud.
Como parti di e bishita aki, Clifford Rosa presidente di Stichting Rancho a presenta famia de Kom, Hiadees de Kom y Anthon De Kom kende ta famia di un hereo nacional na Surnam esta Anton De Kom y awendia ambos decendiente ta biba na La Guajira. Prome Minister Mike Eman a ricibi Maria Isabel Cabarcas Aguilar, directora di Revista SER Caribe y Fundacion InspirARTE Aain.
Durante un reunion cu Prome Minister Mike Eman, e delegacion a haci entrega di e prome edicion di Revista SER Caribe. Tambe nan a presenta e di dos edicion, cu a lansa anteriormente den formato digital durante e simposio “Brug entre Generacionnan” na Universidad di Aruba. E front page di e ultimo edicion ta dedica na Ramon Todd Dandare, reconoci como un di e principal guardian di nos idioma Papiamento.
Ademas, e delegacion a entrega un invitacion oficial na Prome Minister Mike Eman pa participa den e XV Festival Internacional del Bolero, cu lo tuma luga na Riohacha, Colombia, entre 13 y 16 di november 2026.
Durante e encuentro tambe a comparti informacion tocante e trabounan cu Stichting Rancho y Fundacion InspirARTE Aain ta realisa pa fortalece integracion cultural, lenguahe, academico, artistico y literario entre Aruba y La Guajira. Tambe a destaca e resultado di Encuentro Caribeño Colombo Neerlandes “Mma Pe’ ipaasu”, iniciativa cu a conmemora 200 aña di relacionnan diplomatico entre Reino Hulandes y Colombia.