Delegacion di Aruba a ricibi recorido den sector primario na Sint Eustatius y Saba

E delegacion a consisti di Minister di Transporte, Integridad, Naturalesa y Asunto di Adulto Mayor Ursell Arends, Directora di Santa Rosa Aruba, Sra. Nathalie Maduro y Chef Afdeling Visserij na Santa Rosa, Sr. Byron Boekhoudt.

E conferencia Dutch Caribbean Agriculture Livestock and Fisheries Alliance (DCALFA) a tuma luga pa prome biaha na 2022 na Corsou, na 2023 na Aruba, y e aña aki Gobierno di Sint Eustatius tabata anfitrion. Na 2023, tur 6 isla den Reino Hulandes, a firma un MoU pa promove cooperacion entre e islanan pa cu e sector di agricultura, cria y pesca y asina comparti conocimento, experiencia y exito di cada isla den e sector aki. DCALFA ta brinda oportunidad valioso pa experiencia personalmente e iniciativanan cu ta tumando luga den sector primario na islanan den Reino Hulandes. E biaha aki a experiencia esaki na Sint Eustatius y Saba.

E delegacion di Aruba y demas participantenan a bishita Saba unda a ricibi un recorido na varios sitio agricola, entre nan criadonan di galiña y cabrito, un instancia di hydroponics, Fundacion Saba Reach y un facilidad unda e piscadonan di Saba por warda nan materialnan. Tambe a haya un recorido na e Departamento di Agricultura, Cria y Pesca di Sint Eustatius, acompaña pa Sra. Sharon Veira, kende ta encarga cu e parti di Agricultura y Servicio Veterinario. Durante e bishita por a observa e diferente actividadnan agricola, conoce cunukeronan local y explora proyectonan di reforestacion na e isla, incluyendo e costa di Zeelandia.

E experiencia aki a marca un comienso pa e conferencia DCALFA 2024, demostrando e dedicacion di esnan cu ta encarga cu sector primario di e islanan den Reino Hulandes. Asina subrayando e importancia di un red cooperativo y solido entre e islanan pa asegura un futuro fructifero di e sector.