Delegacion di Aruba a atende durante e di 113 edicion di International Labor Conference

Na e sesion di 2025 di e Conferencia, Gobierno, dunado di trabou y delegadonan di trahado di e 187 Estadonan Miembro di ILO lo atende asuntonan importante di mundo laboral manera posibel normanan internacional nobo riba proteccion di trahadonan contra peligernan biologico den e ambiente di trabou, trabou decente den e economia di plataforma y enfokenan innovativo pa promove transicionnan di economia formal pa formal.

Pa Aruba, e biahe tin su balor agrega. Minister Cicilia a topa cu e delegacion di Aruba cu ya ta presente na Geneve, kende ta consisti di algun experto laboral y sindical. 

E delegacion di Aruba: Presidente di Federacion di Trahadornan di Aruba (FTA), Hose Figaroa, Eugenio “Tito” de Cuba na nomber di e dunadonan di trabou, consehero huridico di Directie Arbeid en Onderzoek (DAO), Anthony Lee Rivears, 'researcher' di DAO Tivisay Boekhoudt-Tromp y consehero di Ministerio di Labor, Julie Kelly. Na cabes di e delegacion di Aruba, Minister di Turismo, Transporte y Labor, mr. Wendrick Cicilia

Tur aña ta enfoca riba e metodo di tripartiet: caminda gobierno, organisacion di dunado di trabou y di e trahadonan tin un stoel n’e mesa di combersacion. E delegacion Rubiano lo ta hunto cu e delegacion di Reino Hulandes. Minister Cicilia ta prepara pa intercambia plan y vision hunto cu demas paisnan den Reino Hulandes.

Rib’e prome dia di trabou na Geneve, Minister Cicilia a reuni cu ‘Sectoral Policies Department’, su ‘deputy director’, Yukiko Arai. A topa un rato despues cu Vice-Minister di Labor di Hulanda y director general, Stan Kaatee, Minister Cicilia asina cu a termina e reunion cu vice-minister di labor a sigui dibiaha cu un otro reunion fructifero cu representante permanente di Reino Hulandes na ILO, Peter van Rooi y Raul van de Ven.

Prome cu e dia a culmina, ainda a topa cu Glady Cisneros kende t’un experto rib’e tereno di ‘labour migration’ y pa culmina e prome dia, a topa cu representante di Ministerio di Labor y Asuntonan Social di Hulanda, Manon Post. Minister Cicilia ta mira bek riba un dia fructifero, hopi reunion, uno tras di otro pero contento cu e resultado pa Pais Aruba.

Di e forma aki lo crea lasonan importante caminda por sostenen otro pa mantene siguridad di trabou y trato husto pa tur trahado. Minister Cicilia ta premira cu na final di e biahe di trabou, tin siguransa cu lo bin bek cas carga cu conocemento y di e forma ey contribui pa fortalece nos mercado laboral cu informacion pa mehoracion den maneho y pa leynan nobo, entre otro e ‘arbo wet’.