Declaracion di DVG relaciona cu barco crucero MS Eurodam

E file aki ta den archivo.

ORANJESTAD - Departamento di Salud Publico (DVG) a tuma nota di un publicacion riba media social relaciona cu e barco crucero MS Eurodam, den cual ta insinua cu na Aruba ta permiti malesa (Norovirus) drenta via barco crucero mientras cu otro isla si no a permiti esaki.

Ta importante pa keda informa comunidad cu DVG ta encarga cu e monitoreo di malesanan infeccioso cu tin abordo di tur crucero cu drenta Aruba. Esaki ta sosode pa medio di e asina yama “Maritime Declaration of Health (MDH)” cu tur barco crucero ta obliga di entrega na DVG prome cu drenta e waf di Aruba. A base di analisis di e informacion ricibi pa medio di e MDH di 72 ora-48 ora-24 ora, diadomingo anochi (prome cu e barco a drenta Aruba dialuna mainta) a manda un email pa e operado di e crucero y su persona na su turno a manda esaki pa e dokter responsabel riba e barco, bisando lo siguiente: “Aunque ta mira un disminucion den e casonan di gastroenteritis agudo (AGE), a surpasa e limite permiti di 3% di AGE bou di pasaheronan, cual ta indica un brote di AGE abordo. DVG ta informa cu e personanan afecta mester sigui den isolacion riba e barco.

Pa garantisa salud y siguridad di esnan abordo y pa nos isla, mester sigui e siguiente medidanan sanitario strictamente:

  • E personanan malo mester keda riba e crucero y sigui e protocolnan di isolacion te ora e dokter abordo dicidi otro;
  • Aunkue cu a eleva e medidanan sanitario, a pone extra atencion y cumplimento stricto cu tur medida di higiena;
  • MS Eurodam mes a aumenta nan medidanan di higiena di nivel 2 pa nivel 3.

DVG a duna conseho y recomendacion na e barco pa asina nan por contene e brote di Norovirus abordo. Norovirus ta ocasiona diarea, sacamento y dolor di bariga cerca e persona afecta y ta un virus cu regularmente ta ser detecta of ta presente riba barconan crucero.

E sistema di vigilancia / monitoreo di DVG, ta forma parti di un programa regional Caribbean Vessels Surveillance System di Caribbean Public Health Agency (CARPHA).

Pa mas informacion:

  • Like DVG su Facebook page Directie Volksgezondheid DVG Aruba;
  • Follow DVG riba Instagram directie_volksgezondheid_aruba;
  • Bishita www.dvg.aw;
  • Manda bo mail na servicio@dvg.aw.
Barco crucero MS Eurodam