Cuido integral pa Adulto Mayor: Un plan pa enfrenta e dubbele vergrijzing
ORANJESTAD - October ta luna di Adulto Mayor, un luna dedica pa honra nos adultonan mayor y pone enfoke riba e reto y necesidadnan cu nan ta encontra, mirando e crecemento continuo di e populacion di 60 aña y mas, y tambe e fenomeno di "dubbel vergrijzing" cu ta un aumento di personanan riba 80 aña.
Un embehecimento comun ta ora cu bo comunidad ta haya mas hende riba 65 aña compara cu e cantidad di baby cu ta nace pa aña. Un dubbele vergrijzing ta ora cu den e grupo di 65+ aki, e number di hende riba e edad di 80 aña tambe ta crece.
Aruba ta enfrenta un reto relaciona cu e necesidad di cuido, cu ta cada bes mas halto y caro. Ministerio di Asunto di Adulto Mayor a desaroya un plan integral pa combati e problematica di cuido di adultonan mayor.
A traha cu expertonan di Aruba como tambe internacional pa desaroya un plan integral pa combati e problematica di nos cuido. E ‘Deltaplan’ ta basa riba e concepto cu mientras mas tempo un persona por keda biba den su propio ambiente, manera su cas of cu su famia cerca, miho esaki por ta pa su salud. Un di e metanan di e Deltaplan ta e desaroyo di un "zorgzwartepakket", unda ta investiga y dividi e tipo di cuido segun intensidad y costo pa por evalua con por atende e poblacion cu ta embeheciendo.
E di dos punto di enfoke ta riba mehora e cuido den e adulto mayor su propio cas. Pa haci esaki posibel nos mester educa y prepara famia pa nan por duna apoyo na e adulto mayor. Adicionalmente por fortifica e red social pa yuda cu salud fisico y mental. Tambe a lansa e proyecto PASADIA cu ta duna e adultonan mayor un espacio pa participa den actividadnan di recreacion y socialisacion, manera terapia di musica, weganan di mesa y combersa cu demas miembronan. Tres ubicacion di Pasadia ta habri actualmente, den colaboracion cu organisacionnan manera Wit Gele Kruis, FCCA, SABA, Buurtzorg, Cas Marie, YMCA y Rode Kruis.
Cu e plan integral aki y e diferente proyecto y colaboracionnan, Aruba ta duna un paso crucial pa atende e necesidadnan creciente di nos adultonan mayor y yuda nan mantene nan dignidad y bienestar.