Cuido adecua no ta un fabor, e ta un obligacion! Tuma un bestia di cas ta nifica tuma responsabilidad. Tur dia.

ORANJESTAD – Departamento di Salud Publico (DVG) ta haci un yamada na tur doño di mascota pa tuma responsabilidad y cuida nan bestianan bon.

Brinda bo mascota cuido adecuado ta nifica ser un doño responsabel. Stima un mascota no ta demostra solamente cu palabra. Amor ta  mustra den e cuido cu e animal ta ricibi tur dia. Un doño responsabel ta percura pa su mascota tin tur loke e mester pa biba saludabel y sin sufrimento innecesario.

Segun e Hondenverordening un cacho mester:

  • Ricibi suficiente cuminda di bon calidad;
  • semper tin awa limpi disponible
  • haya proteccion contra solo, yobida y biento. 
  • haya cuido veterinario, ora esaki ta necesario 
  • tin suficiente espacio pa move, hasta si e ta na liña.

Falta di awa, un cas cu no ta proteha contra calor, herida sin tratamento, hamber of falta di espacio, no ta solamente falta di atencion; nan ta señalnan cu no ta cumpli cu e necesidad basico di e animal.

Responsabilidad ta observa bo mascota tur dia. Cambionan den apetit, peso, comportacion, cuero, lana of forma di cana por indica cu e mester ayudo. No warda te ora su condicion bira grave.

Si bo mira un animal cu ta sufri, raporta e situacion na autoridad competente y duna informacion concreto. Conscientisacion sin accion no ta suficiente. Proteccion di nos animalnan ta responsabilidad di nos tur.  

Base legal: Hondenverordening, articulo 2, y Regeling welzijn honden, AB 2013 no. 67.

Sea bo tambe un doño di mascota responsabel. Cada acto di responsabilidad ta salba un bida. 

Planta amor, proteha nan bienestar y hunto nos por logra un Aruba sin animalnan bandona.

Pa keda semper informa:

Doño responsabel