Cuida Aruba: Dos dia di accion nacional den union na limpiesa di nos isla

Esfuerso nacional Gobierno di Aruba ta bolbe reuni comunidad, sector priva y diferente institucionnan den un durante dos dia cu un solo obhetivo.  

Gobierno di Aruba ta bolbe reuni comunidad, sector priva y diferente institucionnan den un durante dos dia den un accion coordina na nivel nacional. E obhetivo  ta limpiesa, boluntariado y preparacion pa e temporada di awacero pa ta miho prepara pa cualkier eventualidad.

 Prome Minister Mike Eman a enfatisa cu e exito di e prome edicion a confirma cu ora Gobierno, sector priva y comunidad uni nan forsa, Aruba por logra resultado concreto cu ta beneficia henter sociedad.

“Cuida Aruba a demonstra cu nos pueblo ta dispuesto pa uni forsa pa cuida nos isla. E di dos edicion ta amplia e esfuerso ey y ta invita henter pueblo, organisacion y empresa pa forma parti di un movimiento nacional di responsabilidad comparti,” Prome Minister a declara.

Cuida Aruba a evoluciona mas aya di un accion di limpiesa. E iniciativa ta forma parti di un vision mas amplio di Gobierno pa fortalece participacion comunitario, crea mas consciencia riba cuido di espacio publico y prepara Aruba pa e retonan cu e temporada di yobida y tormenta ta trece.

“Cada iniciativa cu contribui na un Aruba mas limpi ta un aporte valioso. Sea cu ta limpia un cancha deportivo, un centro comunitario, un scol of un otro espacio publico, loke ta importante ta cu nos traha hunto. Cuida Aruba ta di tur hende,” el a añadi.

Prome Minister a haci un apelacion na scolnan, clubnan deportivo, fundacionnan, organisacionnan di bario, empresa y ciudadano pa provecha e dos dianan pa organisa accionnan den nan propio comunidad y asina aporta na un esfuerso nacional cu ta trascende Gobierno.

Tambe a expresa su reconocemento na diferente partner cu ta participa den e coordinacion di e iniciativa, incluyendo CMO, DOW, Serlimar, Bureau City Inspector, CEDE Aruba y Ecotech, indicando cu e colaboracion entre institucionnan publico y priva ta esencial pa logra un impacto nacional.

Un di e principal motibonan pa organisa e segunda edicion den e periodo aki ta preparacion di Aruba pa e temporada di awacero. Segun Prome Minister, haci rioolnan, canalnan y area publico limpi ta yuda reduci e riesgo di inundacion, mientras cu eliminacion di desperdicio cu por retene awa ta contribui directamente na prevencion di dengue y otro riesgo pa salud publico.

“Cada taira, frishider, stoof of otro obheto cu por retene awa cu nos kita for di caminda ta representa un riesgo menos pa nos comunidad. Cuida Aruba ta inverti den limpiesa, pero tambe den salud y prevencion,” Mike Eman a enfatisa.

Coordinador di e iniciativa, Rino Hermans di CMO, a splica cu a adapta e programa di e di dos edicion basa riba e experiencia di e prome accion nacional. Entre e mehoracion cu a implementa tin un expansion di e capacidad logistico, un mihor distribucion di e puntanan di deposito y un coordinacion mas eficiente pa transporte y procesamento di desperdicio.

Hermans a enfatisa tambe e importancia pa comunidad separa desperdicio prome cu hiba esey na e puntanan di coleccion. Esaki lo facilita un proceso di descarga mas rapido y permiti cu e fluho di e bakinan cana di un manera mas eficiente durante henter e accion.

Director di CEDE Aruba, Daniel Tecklenborg, a destaca cu boluntariado ta sigui e curason di Cuida Aruba. Segun Tecklenborg, e prome dia, diabierna 28 di augustus, lo enfoca principalmente riba accionnan di boluntariado, cu participacion di empresa, hotelnan, scolnan, scouting, organisacionnan social y grupo di hubentud, mientras cu diasabra 29 di augustus lo brinda comunidad e oportunidad pa haci nan cas, bario y entorno limpi y haci uzo di e puntanan di coleccion habilita pa e fin di siman.

Di nan banda, Serlimar a confirma cu lo amplia su capacidad operativo cu personal y bakinan adicional pa facilita e coleccion di desperdicio durante tur dos dia, mientras cu DOW lo pone makinaria pisa na disposicion pa haci canalnan, banda di caminda (berm) y otro area limpi cu ta rekeri ekipo specialisa.

Gobierno di Aruba a recorda tambe cu e Centro di Desperdicio ta habri durante henter siman y a invita comunidad pa sigui haci uzo responsabel di e facilidadnan disponibel, no solamente durante Cuida Aruba, sino como parti di un compromiso permanente cu cuido di nos isla.