Cuerpo Policial Aruba den celebracion di 40 aniversario
ORANJESTAD - Cuerpo Policial Aruba (KPA) a conmemora su 40 aniversario cu un Santo Sacrificio di Misa na Pro-Catedral San Francisco di Asisna Playa, den presencia di Su excelencia Gobernador, autoridadnan, invitadonan special y un cantidad grandi di miembro di comunidad.
E celebracion a forma un momento di reflexion, gratitud y oracion pa tur miembro di Cuerpo Policial Aruba y pa pidi proteccion continuo den nan importante labor na servicio di pais.
Presente na e misa tabata, entre otro, Gobernador di Aruba, Su Excelencia Alfonso Boekhoudt, Minister di Husticia mr. drs. Arthur Dowers, Korpschef di KPA Ramon Arnhem, Vicepresidente di Parlamento Muzaninn Wever, miembronan di Parlamento, alto funcionarionan di sector di husticia, diferente hefe di departamento, pensionadonan di Cuerpo Policial y delegacionnan invita for di diferente pais.
Na final di e celebracion religioso, Minister Dowers a dirigi palabra na esnan presente y a felicita Cuerpo Policial Aruba cu e logro importante di 40 aña.
E celebracion di 40 aniversario a conta tambe cu presencia di delegacionnan policial di Hulanda, Corsou, Boneiro, Saba, St. Eustatius, Sint Maarten y Suriname. Minister Dowers a duna nan un bonbini special y a destaca cu nan presencia ta simbolisa no solamente sosten, sino tambe e compromiso comparti pa combati criminalidad tanto local, dentro di Reino, como internacionalmente.
Despues di e misa, e diferente cuerponan a participa den un desfile oficial cu a pasa dilanti Bestuurskantoor.
E programa a continua despues cu un lunch na Renaissance Ballroom, como parti di e actividadnan conmemorativo di e 40 aniversario.
Minister Dowers ta felicita Korpschef, liderazgo, miembronan activo, pensionadonan y henter Cuerpo Policial Aruba pa nan aporte durante e ultimo 40 aña. El a desea nan un bon siman di celebracion y actividadnan, den un ambiente di camaraderia hunto cu e delegacionnan bishitante.
Cu 40 aña di historia tras di lomba, e celebracion ta marca no solamente un momento pa mira bek riba e trayectoria di Cuerpo Policial Aruba, sino tambe pa mira dilanti: fortalece integridad, inverti den un generacion nobo di polis y prepara KPA pa e retonan di siguridad di futuro.