Crisis Management Office a entrega Plan di Siguridad pa Carnaval 2024

Pa prome biaha Aruba tin un Plan di Siguridad pa Carnaval. CMO hunto cu SMAC a traha e plan di siguridad cu participacion di tur grupo di carnaval. Den a plan ta stipula e palabracionnan haci riba diferente aspecto di siguridad pa tur carnavalista. Cada lider di grupo a reuni individualmente cu CMO y a firma e palabracionnan pa por garantisa e siguridad di participantenan y tur esnan cu ta contribui cu carnaval.
A palabra entre otro con halto e sonido di e bandanan por ta den paradanan di carnaval. Pa paradanan di mucha e maximo ta 90dB y e muchanan mester ta 7 meter leu di e speaker y mester tin earplugs bisti. Tanto Gobierno como CMO ta di opinion cu mester protege muchanan di dañonan permanente na nan oido y na nan salud. Pa parada grandi, esnan cu ta participa ta den forma boluntario y ta responsabel pa nan propio actonan, e maximo ta 120dB.
CMO ta haci control durante tur parada a base di e palabracionnan di e Plan di Siguridad y por bisa cu te awor, tur banda a tene nan mes na e maximo di e sonido y durante parada di mucha 95% di e muchanan a uza earplugs.
Prome Minister a felicita CMO, KPA, SMAC, DTI y gruponan cu a forma parti di e plan aki y a cumpli cu ne. E intencion ta pa durante tres aña, traha cu e plan aki pa tur evento publico, cu tin mas di 2000 hende y despues adapta unda mester y finalisa e plan.
Aparte di esaki, CMO ta pone un “hospital on the field” riba e ruta di parada, na unda cu ta duna asistencia na tur cu ta participa y acudi na e carnaval y asina kita un tiki di e peso for di Hospital Horacio Oduber su servicio di emergencia.
Drentando e simannan final di Carnaval, Gobierno y CMO ta urgi tur banda y grupo pa tene nan mes na e palabracionnan haci y pone interes di nos carnavalistanan na prome luga.