Cortamento di cinta pa duna apertura na agencia oficial di autonan BYD na Aruba

BYD ta un marca mundialmente conoci pa su desaroyo di auto electrico cu tecnologia ultra avansa, siguridad optimo y un fuerte compromiso pa un futuro mas limpi pa nos planeta. 

Riba 9 di juli 2025, a tuma luga e apertura oficial di e prome agencia di BYD na Aruba. Esaki ta situa net na banda di Ultimate Automobiles, riba caminda di Tanki Leendert. BYD ta e lider mundial den benta di auto electrico, superando Tesla den e mercado global. Pa 2025, BYD ta mantene su posicion como e tercer marca di auto mas grandi di mundo, cu un market share di mas di 15%. Den e prome kwartaal a bende mas di 1 miyon auto BYD rond mundo.

Prome Minister Mike Eman, hunto cu sr. Sadesh Manichand, Managing Director di Jolley Holding Aruba y sra. Coco Lin, BYD Caribbean Regional Sales Manager, a corta cinta pa duna inicio na un era nobo den benta di autonan electrico, cual ta cuadra cu e vision nacional pa promove innovacion, sostenibilidad y progreso tecnologico.

Tempo cu a haci introduccion di tarifa reduci pa importacion di auto electrico, e cantidad di auto electrico no a crece cu e rapides desea, pero cu apertura di BYD na Aruba, e mercado aki ta hayando un empuhe enorme, locual ta netamente alinea cu e vision di e Gobierno aki. 

Assistant General Manager di BYD Aruba, sr. Gershom Oduber, a indica cu e autonan aki ta 100% electrico y ta conta cu un interior ultra moderno yena cu e ultimo tecnologia, entre otro e pantayanan touchscreen, sistema di sonido di calidad y e diseño futuristico. Ademas cada auto BYD por fungi como un “powerbank” den momento di urgencia, caminda e por suministra coriente pa asina recarga un of otro ekipo.

Cu e yegada di BYD, Aruba ta fortifica su compromiso cu energia limpi, movecion moderno y desaroyo duradero.