Conferencia di Clima y Energia 2025: Compromiso firme pa un Aruba sostenibel

E di dos edicion di e Conferencia di Caribe Clima y Energia ta tuma luga na Corsou. Construyendo riba e exito di e evento inaugural na Aruba na 2023, e conferencia aki ta crucial pa fomenta colaboracion, intercambio di conocemento, y inicia pasonan concreto pa atende resiliencia di cambio di clima tanto regional- como globalmente.

Den estrecho cooperacion cu Ministerio di Asuntonan Economico y Politica di Clima di Hulanda, Corsou ta prepara pa ta anfitrion di e evento significante aki.

Den un mundo caminda e narativo di clima hopi biaha ta parce scur, tin speransa. Probechando di nos experticio y recursonan colectivo, nos por salvaguardia nos islanan pa futuro generacionnan. E conferencia aki no ta djis un evento; e ta un yamada pa accion pa tur cu ta comprometi pa crea un Caribe resiliente y sostenibel.

Durante e conferencia, Prome Minister Mike Eman a comparti dos tema importante: compromiso continuo y e bon comun. Sin continuidad, ta perde e meta pa e bon comun. Prome Minister ta elogia Aqualectra cu awo ta produci casi na 50% di energia renobabel y recien a instala e di 4 parke di molina y reduci e prijs di coriente cu 20%. A cana e caminda di transicion for di e dependencia di fossil fuel y heavy fuel oil pa produci energia limpi, uzando e biento y solo, locual ta e caminda riba Aruba tabata cana ora Aruba tabata lidera e vision aki den region. 

Corsou, awe ta produci casi 50% di energia renobabel na un prijs di coriente reduci cu 20%. “Corsou ta implementa e mesun blueprint cu Aruba a diseña den nos tempo y a haci uzo di e modelo “RAS” – Reliable, Affordable y Sustainable. Nan a combina energia solar cu bateria grandi di 50 megawatt pa keda provee energia renobabel anochi.

Segun Premier Eman, e Gobierno aki mester adopta un plan pa bolbe riba e podium regional di energia renobabel, cu e siguiente tres punto:

1. Redobla capacidad di molinanan di biento na Vaderpiet, cambia molinanan cu ta genera 3 megawatt pa modelonan nobo cu ta genera 6 megawatt.
2. Construi un parke di biento nobo pa yega te 60% di energia renobabel.
3. Inverti den parke solar riba e areanan di parkeo grandi manera hospital y hotelnan similar na esun di aeropuerto, combina cu baterianan di capacidad grandi pa warda energia genera durante dia pa uzo anochi.