Comision Trafico sigur cu Encuesta Nacional

Debi na e cantidad di accident cu por preveni ta keda halto, Comision Trafico Sigur ta mira e necesidad urgente pa mehora siguridad den trafico y ta convenci cu e participacion di e comunidad ta esencial pa desaroya solucionnan efectivo pa e retonan actual den trafico. Cu e encuesta aki, Comision Trafico Sigur kier tin un bista amplio di con sigur comunidad ta sinti riba caminda y tambe identifica areanan cu por mehora.

E encuesta “Siguridad den Trafico” ta habri pa tur usuario cu di un of otro manera ta participa den trafico, sea ta automobilista, motociclista, ciclista, peaton etc. Tur participante mester ta biba na Aruba y tin un edad di minimo 18 aña pa comparti su opinion. Pa participa por bishita e encuesta y scoge e idioma preferi (Papiamento of Ingles). E encuesta tin un duracion di entre 5-7 minuut y ta anonimo y confidencial. Comision Trafico Sigur ta urgi comunidad pa participa na e encuesta aki online of den persona den encuentronan cu lo organisa. Ademas lo organisa un grupo di enfoke cu varios stakeholders pa scucha opinion di sectornan cu ta relevante pa cu trafico.

Pa esnan cu kier participa pa gana premio, mester registra nomber y email. Esaki ta opcional, y cada participante na e encuesta por scoge nan preferencia.

Participa na e encuesta y contribui pa un trafico mas sigur. Salba bida, scoge pa siguridad.