Coleccion Aruba ta haya atencion internacional

E file aki ta den archivo.

ORANJESTAD - Recientemente Aruba su Plataforma Coleccion Aruba tabata den noticia internacional. Sra. Ali Rogin, reportera y coresponsal di PBS News a traha un segmento den noticia tocante con e cambio di clima ta afectando e paisnan chikito cu ta mas vulnerabel. 

PBS ta un canal publico na Merca y PBS News ta transmiti via Youtube y tin mas cu 4 miyon suscriptor.

Pa e ocasion aki e la concentra riba Tuvalu, un nacion insular consistiendo di shete isla den Pacifico cu ta disparciendo poco poco. Alabes sra. Rogin a duna atencion na e portal digital Coleccion Aruba enfatisando e importancia pa preserva archivo, documento y grabacionnan cu ta herencianan cultural cu ta vulnerabel pa e efectonan di cambio di clima. Coleccion.aw ta e archivo digital mas grandi na Papiamento y ta brinda acceso liber na archivo digital di documento, potret, video y grabacionnan di Aruba.

Pa e parti di Tuvalu, e reportera a entrevista Minister di Asunto di Exterior, sr. Simon Kofe y un representante di Nacionnan Uni di Tuvalu, sr. Tapugao Falefou cu a splica e retonan cu e pais chikito aki ta encontra door di e cambionan di clima. Segun sra. Rogin, cambio den clima, no solamente por haci daño na infrastructura pero tambe ta forma un peliger pa archivo-, documento- y otro artefactonan, ya cu esakinan por keda destrui y asina un parti importante di historia general y historia cultural di un pais por bay perdi.

Den un entrevista cu sra. Kate Knibbs cu a skirbi un articulo tocante e colaboracion entre Coleccion Aruba y Internet Archive, cu ta e Plataforma digital cu ta ‘host’ Coleccion Aruba, sra. Knibbs a elabora riba e importancia di digitalisacion di documentonan.

Pa e parti di Coleccion Aruba, e reportera di PBS News a entrevista Sr. Peter Scholing, investigado na Biblioteca Nacional Aruba y e iniciado di Coleccion Aruba y tambe e historiado y autor dr. Adi Martis. 
Sr. Scholing ta splica dicon ta importante pa preserva herencia cultural di forma digital, especialmente awor cu e cambio di clima cu e temperatura ta subi. dr. Martis a brinda informacion tocante e eficiencia di Coleccion Aruba pa e como investigado, na momento cu e tabata investiga por ehempel tocante sclavitud na Aruba.

Por mira e noticia aki riba https://www.youtube.com/watch?v=3cSL2xFNOLU