Cocolishi nobo descubri den e awanan di Aruba ta hiba e nomber di Caquetio
ORANJESTAD – Riba 2 di december, malacoloog (cientifico cu ta studia cocolishi manera slak y mossel) Leo Ros, a haci entrega na Prome Minister di Aruba, Mike Eman un carta cu informacion tocante e cocolishi nobo aki, cu awo ta carga e nomber Caquetio.
Durante bishita, Prome Minister Eman a ricibi un copia firma di e publicacion “The Archaeology of Aruba: The Marine Shell Heritage”.
A comparti informacion importante tocante especie nobo endemico di cocolishi marino, cu recientemente a nombra na honor di e tribu Caquetio, e habitante original indigena di Aruba.
E siguiente informacion ta referi na e especie nobo:
Voluta Caquetio Berschauer & Ros, 2025
Distribucion:
Especie endemico den costa west di Aruba, e banda pabou di costa, caminda ta sostene su habitad ecologico natural.
Ecologia:
E especie di cocolishi marino aki por wordu haña den awa serca di costa entre 2 te 9 meter di profundidad, riba fondo di lama of bou di coralnan, scondi den santo bou di coral kibra, of entre yerba marino Thalassia testudinum (K.D. Koenig, 1805).
Etimologia:
E nomber ta dedica na e Indjan Caquetio, e pueblo indigena di Aruba y banda noordwest di Venezuela. E Caquetio tabata ocupa Aruba pa milenio, y e cocolishi a representa un recurso natural importante integra den nan cultura (Dijkhoff & Linville, 2004). E nomber ta un relaciona /referi directo na tribu Caquetio.
Nos ta contento cu e investigadonan ta sigui contribui na conocimento y educacion tocante e cocolishinan marino y nan ambiente den e bunita isla di Aruba, ta locual cu Leo Ros a indica.
Franchelle Lacle, consehero pa Bureau Naturalesa y Medio Ambiente, tambe a duna un splicacion breve riba e bishita cerca Prome Minister Eman. Interes pa e parti marino a hiba na descubrimento di un cocolishi cu ta unico pa Aruba (endemico na Aruba).
Durante un bishita den luna di mei, a otorga Mr. Ros un buki caminda e por a sigui e historia di cocolishi den nos area y un indicacion via arkeologonan, riba e uzo di cocolishi antes riba nos isla. Di aki a surgi e nomber di e cocolishi cu recien a keda descubri.