Cobransa di grondbelasting di 2025 a sali
ORANJESTAD – Departamento di Impuesto (DIMP) a saca e cobransa di grondbelasting 2024 y den e siguiente dianan tur contribuyente lo ricibi esaki via post.
E cobransa tin fecha di 2 di juni 2025. Ta trata di un cobransa anual cu tur doño, di un propiedad inmobil of cu tin derecho riba un propiedad por ehempel di erfpacht of vruchtgebruik, ta ricibi.
Pa fiha e suma di impuesto, ta importante pa stipula e balor di e propiedad riba mercado. A base di e balor aki ta haci e calculacion teniendo cuenta cu e tarifa stipula den ley.
Termino di pago
Ley ta duna e opcion pa paga e grondbelasting den un solo biaha of den termino.
Aki ta sigui e schema di e terminonan di pago manera stipula pa ley:
| Grondbelasting 2025 - Fecha 2 di juni 2025 | ||
| Termino di pago | Fecha final pa haci pago | Suma di pago rekeri segun ley |
| E prome dos terminacion di pago | 2 di juli 2025 | 50% di e suma di cobransa pa cubri e prome y di dos kwaartal (jan - maart y april - juni) |
| Di tres termino di pago | 30 di september 2025 | 25% di e suma di cobransa pa cubri e di tres kwartaal (juli – sept) |
| Di cuater termino (ultimo termino) | 5 di januari 2026 | 25% di e suma di cobransa pa cubri e ultimo kwartaal (october – december) |
| Pa dia 5 di januari 2026 e cobransa di aña 2025 lo mester ta completamente paga. | ||
Departamento di Impuesto ta conseha e contribuyentenan pa lesa e texto imprimi riba e cobransa cu hopi atencion pa cu e terminonan di pago.
Preferibel haci pago online
Por haci pago na un oficina di DIMP, MFA of via banco. Departamento di Impuesto ta recomenda pa haci pago di impuesto online via banco, preferiblemente via Aruba Bank, CMB of Banco di Caribe. E sistemanan di e banconan aki ta conecta automaticamente cu e sistema di DIMP y e mesun dia e transaccion ta keda registra. Ora di haci pago online mester scoge e opcion di Bill Pay y no Transfer. Mester menciona: grondbelasting 2025, number di cobransa y persoonsnummer. Di e forma aki DIMP por procesa e pago corectamente.
Areglo di pago
E contribuyente cu no por paga su cobransa di acuerdo cu e terminonan legal, por haci un peticion pa areglo di pago. Mester haci e peticion aki mas pronto posibel. Asina e cliente mes por evita cu DIMP ta continua cu e proceso di cobramento cu gradualmente por bira mas severo, locual por nifica tambe gasto extra pa e cliente. Pa mas informacion di e cobransa di grondbelasting por yama DIMP na 522 7423 of 522 7424.
