Charla informativo: Conscientisacion y prevencion di abuso di mucha

Gobierno ta pidi tur ciudadano pa sigui compromete nan mes y uni den e lucha pa proteha nos muchanan y ofrece nan amor y cariño pa asina nan por crece feliz y bira adultonan cu por carga e pais aki.

Relaciona cu Luna Nacional Contra Abuso di Mucha, Fundacion Mi Voz ta bo Voz, Comision Nacional di Abuso Sexual di Mucha y Gobierno ta presenta charlanan informativo: Conscientisacion y Prevencion di Abuso di Mucha. 

E anochinan informativo aki ta di 7or PM pa 9or PM y lo tuma luga riba e siguiente fecha y localidadnan di MFA:

• Diahuebs 11 di april, MFA Noord;
• Diahuebs 18 di april, MFA Paradera;
• Diahuebs 25 di april, MFA Savaneta;
• Diamars 30 di april, MFA Santa Cruz.

Oradonan pa e charlanan ta profesionalnan na Aruba cu ta trahando cu y tratando casonan di abuso di menor den nan diferente areanan di trabou. E oradonan ta: Drs. Melva Croes-Yanez, NeuroPsycoloog; Dr.Audrey Khan, Klinische Psycoloog; sra. Magali Maduro, Directora Bureau Sostenemi y sra. Omaira Britten, Poeta.

E anochinan informativo lo brinda informacion clave riba con pa reconoce e señalnan di abuso sexual di mucha; e impacto riba e victima y nan famia y con cada ciudadano por hunga su parti den prevencion y intervencion. Participando den e eventonan aki, bo no solamente ta habilita bo mes cu conocemento riba e tema aki, pero tambe ta contribui na un cultura di conscientisacion y proteccion contra abuso sexual di mucha. Hunto nos por proteha e bienestar y dignidad di cada mucha na Aruba.

Cada mucha merece un ambiente sigur y cuido, liber di e menasa di abuso y explotacion. Abuso sexual di mucha ta keda un problema persistente mundialmente, incluso den nos mesun comunidad y hogarnan na Aruba. Ta esencial cu nos uni nos forsa pa educa nos mes, proteha nos muchanan, y traha pa crea un futuro mas sigur pa nan.