Celebra Dia di Cero Desperdicio 2024: hunto nos por reduci desperdicio!

Directie Natuur en Medio (DNM), como autoridad responsabel pa nos medio ambiente ta uni na e observacion aki pa educa comunidad riba e importancia pa un maneho responsabel di desperdicio. 

Riba Dia di Cero Desperdicio 2024 ta pone enfasis riba e necesidad pa reenforsa maneho global y e importancia di practicanan di produccion y consumo sostenibel. Desperdicio y polucion di sushedad ta interumpi e ecosistema y ta forma menasa pa bienestar general. Desperdicio por stagna crecemento economico di un pais of region.

Na Aruba, nos tin un reto grandi pa enfrenta cu desperdicio no organico pero tambe desperdicio di cuminda. Ta importante pa cambia e conducta di con pa anda cu desperdicio y evita cu ta deposita desperdicio na unda cu ta. Despues cu a cera e dump na Parkietenbos, comunidad mester bira mas consciente cu tin diferente sitio/ instancia y negoshinan, na unda por deshaci di desperdicio cu eventualmente lo haya un destinacion nobo. Mayoria di e sitionan aki tin un costo pa deposita e desperdicio, mientras algun ta tuma esaki ainda gratis. E proceso aki ta locual ta aporta na un economia circular.

Con por contribui na un Aruba mas limpi?

• Planea bo compras: traha un lista di compra y cumpra solamente loke bo mester cu menos envoltura posibel.
• Reduci consumo: Evita uza productonan cu envoltura innecesario. Scoge productonan cu por re-uza of recicla.
• Come consciente: Planea bo cuminda, conserva loke ta resta di cuminda pa otro dia.
• Composta desperdicio di cuminda: Composta desperdicio organico pa crea bon gordura pa bo matanan.
• Recicla: Separa bo desperdicio pa recicla segun e instruccionnan di servicio di recoleccion.
• Reuza: Duna un otro funcion na obhetonan di tur dia. Evita tira nan afo sin considera otro proposito.

Hunto nos por logra un Aruba mas sostenibel!

E meta di desaroyo sostenibel cu ta directamente asocia y relevante pa Dia di Cero Desperdicio ta SDG number 12, cu ta pa garantisa normanan di consumo y produccion sostenibel (Ensure sustainable consumption and production patterns). 

E otro metanan di desaroyo sostenibel (SDGs) asocia cu dia di Cero Desperdicio ta: 

• SDG# 6 - Awa limpi y saneamento (Clean water and sanitation);
• SDG #11 Ciudad y comunidad sostenibel (Sustainable cities and communities);
• SDG #13. Accion pa clima. Tuma accion urgente pa combati cambio di clima causa pa ser humano (Climate action - Take urgent action to combat climate change caused by humans and its impacts)

Directie Natuur en Medio Ambiente ta comprometi na yuda Aruba alcansa un futuro sin desperdicio. Pa mas informacion di Dia Internacional di Cero Desperdicio, bishita e pagina di Directie Natuur en Milieu riba Facebook(external link) of website di Nacionnan Uni https://www.un.org/en/observances/zero-waste-day(external link).