Carbon Trading ta mustra prometedor pa modelo economico sostenibel

Ministerio di Asunto Economico, Comunicacion y Desaroyo Sostenibel, a laga investiga e beneficionan potencial di carbon trading, un iniciativa den e Plan di Accion 2023-2025: Aruba su transicion pa un modelo economico sostenibel y inclusivo. E estudio aki tabata dirigi pa analisa e oportunidadnan y bentaha di compra y benta di carbon credits na Aruba, cu por te hasta sirbi como un entrada adicional pa pais Aruba.

E sondeo tabata tin como meta pa determina cuanto CO2 credits (1 credit = 1 ton CO2) Aruba por produci via diferente proyecto sostenibel, y kico su balor potencial ta awo y den futuro, pa por midi e factibilidad pa cumpra y bende esakinan riba e mercado internacional.

Carbon trading ta basa riba e concepto cu individuonan of companianan responsabel pa emision di CO2 por cumpra carbon credits di entidadnan cu ta contribui activamente na practicanan sano pa medio ambiente, y asina mitiga nan propio impacto riba cambio climatico.
Carbon credits ta ser acumula por medio di desaroyo di e.o. proyecto di energia via panelnan solar of molina di biento, preservacion di reservanan natural.

Matanan di Mangel y yerba di lama tambe ta importante pa preserva pasobra nan ta absorba un cantidad mas grandi di CO2 compara cu matanan regular riba tera. Otro iniciativanan tecnologico cu ta sea reduci emision di CO2, of absorba esaki (Carbon Capture) tambe ta yuda acumula carbon credits.

Basa riba e resultadonan inicial prometedor di e sondeo, a bira cla cu carbon trading ta un opcion viable pa Aruba. E siguiente fase lo mester ta e preparacion di un plataforma di compra y benta di carbon credits. Uzo di carbon trading ta contribui na un desaroyo mas sostenibel door di stimula practicanan cu ta reduci CO2 y inversion den energia renobabel.