Cambio di Wetboek van Strafvordering nobo

Minister di Husticia y Asunto Social sr. Rocco Tjon a duna di conoce cu prome cu a yega asina leu, a hiba un proceso extenso cu a inicia na 2013. Mirando e importancia di e cambionan aki, Gobierno a haci tur esfuerso pa concretisa e esakinan y asina Aruba a bira e prome partner di Reino pa introduci e wetboek nobo.

E prome paso den e trayectoria di e Wetboek van Strafvordering nobo a encera un acuerdo cu sra. Monique Moss, pa traha un plan van aanpak. Sra. Monique Moss tabata encarga cu e parti di Wetboek van Strafvordering na Hulanda, y a traha e plan van aanpak pa e introduccion na Aruba.

A base di esaki a instala un stuurgroep cu ta consisti di Ministerio Publico, Corte, Ministerio di Husticia y Asunto Social, Cuerpo Policial y KIA. Ademas di esaki, a base di su conseho a introduci dos grupo di trabou , un pa e parti di detencion preventivo (voorlopige hechtenis), cual a consisti di Ministerio Publico, Corte, Cuerpo Policial di Aruba, Ministerio di Husticia y Asunto Social, Reclassering, Departamento di Asunto Social, KIA, Landsrecherche, Koningklijke Marechaussee, Cuerpo Especial Arubano (CEA) y Orde van Advocaten.
E otro werkgroep a consisti di slachtofferrecht, pues derecho di victimanan, cu tabata consisti di Ministerio Publico, Corte, Cuerpo Policial, Ministerio di Husticia y Asunto Social, Family Justice Center y Orden di Abogado (Orde van Advocaten). Ta trata di un trayectoria bastante amplio prome cu por a yega na trata e ley aki den Parlamento, pa asina bin cu cambionan al caso cu beneficionan real pa detenidonan y victimanan.

E mandatario di husticia a elabora riba e cambionan, y kico esaki ta nifica pa e Wetboek van Strafvordering nobo, cu lo drenta na vigor 1 di april 2024. 
Na prome luga e Wetboek van Strafvordering nobo lo duna mas derecho na e victima. A base di e cambionan aki, e victima por tuma nota di e documentonan cu ta trata durante di un caso penal caminda antes esaki no tabata posibel. Awo e victima tin bista (inzage) riba e ‘processtukken’, cual ta hopi importante. Banda di esaki, e victima lo tin ‘spreekrecht’, pues e mes por vocifera durante di un caso kico e ta sinti y pensa.

Pa loke ta e indemnisacion (schadevergoeding), actualmente esaki ta limita na 50 mil florin, y aworaki a base di e Wetboek van Strafvordering nobo no ta bay tin un limite mas. Esaki ta nifica cu e victima, tin derecho di ricibi e compensacion segun e victima ta haya husto, con tal cu por prueba esaki.

Pa loke ta trata e detenido y victima, ta bay introduci ‘snelrecht zittingen’. "Snelrecht’, ta un palabracion haci entre Ministerio Publico y Corte, den cual un persona deteni por ehempel pa
posesion di arma, bringamento riba caya, menasa, destruccion etc. si ta trata di un caso “simpel”, ta aproba e ‘voorlopig hechtenis’, pa motibo cu e ta un caso “simpel”, y ta yega corte hopi mas lihe. Esaki ta beneficia tanto e victima como e detenido pasobra ta termina e caso mas lihe. Tur interogacion pa loke ta trata e ‘voorlopig hechtenis’ mester ta graba awo, pa garantisa e integridad di cada investigacion.

Por ultimo, e instancianan encarga cu investigacion manera Ministerio Publico y Cuerpo Policial di Aruba ta bay haya hopi mas autoridad, pa nan por combati criminalidad na un manera mas eficiente y eficaz.