Cambio di maneho den transporte publico: monopolio riba traspaso di permiso a keda elimina

E maneho ta encera ta encera cu desde no lo aproba peticion di traspaso di permiso di transporte publico.

Cada ciudadano mester tin e mesun oportunidad pa yega na remarke pa haci uzo di un permiso di transporte publico. E realidad ta diferente.

Tin cantidadnan maximo pa cada tipo di permiso di transporte publico (autobus, taxi, tour, ongeregeld, verhuur). Actualmente tin un maximo di 465 permiso pa otorga. Practicamente tur ta otorga, algun pendiente nan prolongacion. Mientrastanto, hopi taxista, ora nan no kier of por core taxi mas, ta pidi pa traspasa e permiso cu nan ta haci uzo di dje pa un persona di nan escogencia.

Segun ley, Minister di Transporte por aproba un traspaso na un miembro di famia di e taxista. Den pasado traspaso a tuma luga na personanan cu no ta un “lid van het gezin” di e taxista. A maluza e posibilidad di traspaso pa por a bende e permiso, cual no ta permiti. E posibilidad di traspaso a crea e situacion cu hopi di e permisonan cu ya ta limita, no ta yega bek cerca Gobierno pa otorga na otro ciudadano cu a haci peticion pa un permiso. Asina a crea un sistema cera (closed system) caminda permisonan, cu ta patrimonio di pueblo, ta keda den famia of ta bay na un persona di escogencia di un taxista, y hasta bendi ilegalmente.

Na september 2022 Minister Arends a revoca e maneho di ex-Minister Romero, y a introduci un maneho mas stricto. Awo a yega na e siguiente paso, cual ta pa para cu traspaso di permiso, promoviendo oportunidad igual pa tur ciudadano cu kier yega na remarke pa haci uzo di un permiso.

E maneho nobo ta encera cu desde 1 di september 2024 no lo aproba peticion di traspaso di permiso di transporte publico. Lo trata peticion haci prome cu 1 di september 2024 conforme e maneho vigente di 26 di september 2022. Desde 1 di september 2024, e maneho di 26 di september 2022 ta keda revoca y no lo tin mas traspaso di permiso.