Cada 8 di september ta celebra Dia Mundial di Fisioterapia
ORANJESTAD – Ta obserba anualmente Dia Mundial di Fisioterapia riba 8 di september pa celebra e profesion y conscientisa tocante e contribucionnan vital cu fisioterapistanan ta haci na salud y mobilidad mundial.
E tema pa e Dia Mundial di Fisioterapia di e aña aki ta rol di fisioterapia y actividad fisico den prevencion, maneho y rehabilitacion di malesanan cardiovascular y atake celebral.
E profesion aki ta hunga un papel fundamental den salud publico, ya cu e no ta enfoca riba trata dolor so, pero tambe riba mehora e calidad di bida di e comunidad completo.
E importancia di fisioterapia ta relaciona cu varios aspecto clave:
- Promocion di Mobilidad y Independencia: E ta yuda hende di tur edad keda activo, preveniendo caida, lesion y e consecuencianan di un estilo di bida sin movecion;
- Alivio y Maneho di Dolor Cronico: Pa medio di terapia fisico, ta reduci e dependencia riba remedi y cirugianan, dunando solucion duradero pa dolor di lomba, schouder y rudia, entre otro;
- Rehabilitacion y Prevencion: E ta acelera recuperacion despues di cirugia, accidente of atake (manera stroke), y ta preveni cu mal postura of sobrecarga no bira malesanan cronico;
- Reduccion di Costo pa Cuido di Salud: Door di preveni complicacionnan y mantene hende independiente, fisioterapia ta alivia e presion riba hospitalnan y servicionan di salud publico.
Curpa den movecion ta e base di un bida saludabel; asina fisioterapia ta yuda pa nos comunidad ta mas fuerte y activo.
