Bureau Traimerdia ta celebra 30 aña!
ORANJESTAD – Recientemente a celebra su existencia cu ta 30 aña di dedicacion, compromiso, crecemento y servicio na nos comunidad.
BureauTraimerdia ta ofrece cuido despues di scol den 8 centro reparti rond Aruba. E centronan aki ta ubica den e edificionan di 7 scol basico y e edificio di Sonrisa. Traimerdia ta destina pa muchanan den enseñansa preescolar y primario, como tambe enseñansa special. Den siguridad di e edificio y facilidadnan di scol, y bou di supervision profesional, e ta stimula muchanan mas den nan desaroyo pa medio di un programa structura.
Durante tres decada, Bureau Traimerdia a sigui evoluciona, cu un meta cu ta traha na bienestar y desaroyo di e muchanan despues di ora di scol. E aniversario aki ta un momento pa honra e historia, reconoce e personanan cu a forma parti di Traimerdia y celebra e team cu ta continua traha cu amor y dedicacion cada dia.
E celebracion di 30 aña tabata un momento pa conecta y dedica atencion na bienestar di nos mes, como profesionalnan y como ser humano.
Den colaboracion cu Departamento di Recurso Humano (DRH) y Departamento di Asuntonan Social (DAS), Bureau Traimerdia a inclui un workshop special tocante salud mental y bienestar, como parti di e celebracion. Un momento pa reflexiona, comparti y recorda cu cuida nos hendenan ta un parti importante di construi un organisacion fuerte y sostenibel.
Bureau Traimerdia ta duna danki na DRH, DAS y Ministerio di Educacion pa nan colaboracion y p’e aporte valioso na e celebracion.
30 aña di historia. 30 aña di dedicacion. 30 aña di Bureau Traimerdia.
Hunto, nos ta mira atras cu orguyo kico tur a logra y pa dilanti cu compromiso y confiansa pa sigui sirbi nos muchanan.