Bureau Sostenemi: Ta necesario traha hunto pa proteha menor

Presente tabata e directora di Bureau Sostenemi, sra. Magaly Maduro, y beleidsadviseur sra. Zuhayla Croes.

Na 2004 a funda Bureau Sostenemi pa fungi como un "advies y meldpunt" pa abuso di mucha y na 2016 a ancra e tarea importante aki den ley. E tempo ey a adapta nos Codigo Civil y pa prome biaha a menciona un meldpunt den Ley.

Bureau Sostenemi ta conta cu cinco trahado social cu ta atende mas o menos 400 caso pa aña. Desde 2021, ta traha cu e Codigo di Proteccion, den cual ta delinea cada paso den e proceso di  meld un caso. Ta prudente pa ora tin un caso di abuso di mucha, cu e referencia ta rapido y cu e cliente por haya yudansa. Tin espacio pa mehoracion di e cadena di cuido y traha di forma preventivo. 

Representantenan di e bureau, a subraya cu e metodo cu nan ta aplica ta dunando resultado y ta logrando e meta principal cu ta proteccion di e menor.