Bo tin pensa di biaha? Busca Bo vacuna contra Sarampi

Dentro di poco nos ta drenta periodo di vakantie escolar y manera ta conoci, hopi local ta bay cu vakantie pa diferente pais y region.
Manera cu Departamento di Salud Publico a bin ta informa comunidad di Aruba, pa algun siman caba, e casonan di Measles/Sarampi of tambe ta sigui aumenta den diferente pais y region rond mundo.

Entre otro:

• Canada
• Mexico
• Diferente estado di USA: Texas, New Mexico, Kansas y North Dakota
• Diferente pais na Europa: Romania, Francia, Hulanda, Italia y Spaña
• Diferente pais na Asia-Pacifico: Vietnam, Kyrgyzstan y Mongolia

Ta conseha esnan cu ta bay biaha pa vacuna contra Measles/Sarampi:

• Si Bo ta sufri di un malesa of condicion di salud cu ta afecta nan sistema inmunologico.
• Si Bo no ta sigur di ta bon vacuna cu 2 vacuna contra Measles.

Pa busca e vacuna por "walk-in" na Seccion di Malesanan Infeccioso na Avisenastraat #1, Oranjestad, minimo 7 dia prome cu biaha.

E vacuna disponibel ta e vacuna MR (Measles, Rubella) of e vacuna MMR (Measles, Mumps, Rubella) cu ta riba mercado for di aña 1971 y ta e mesun vacuna cu ta suministra na Aruba for di aña 1979 na baby y muchanan di scol, pa esnan di Wit Gele Kruis y Seccion Cuido Salud Hubenil.
E vacunanan MR y MMR ta vacunanan cu ta produci cu e metodo tradicional y no ta un vacuna moderno traha abase di e metodo mRNA.

Efectonan secundario comun di e vacuna MMR ta encera:

• Aumento di temperatura corporal of keintura.
• Rash light (e rash ta disparce y no mester tratamento).
• Kliernan por hincha (na garganta of patras di horea).
• Dolor na e luga unda a aplica e hangua.

Bo salud ta bo responsabilidad, tuma accion pa proteha bo mes contra Measles/Sarampi!