Bishita na Centro di Detencion na Dakota
ORANJESTAD - Minister di Husticia, mr. drs. Arthur Dowers, a haci un bishita na Centro di Detencion na Dakota, na unda Guarda Nos Costa ta ubica y ta tene personanan indocumenta cu ta pendiente nan deportacion.
E bishita aki ta tuma luga debi na e situacion alarmante di problema cu adiccion y adictonan ambulante, un situacion cu a bay for di man durante e ultimo añanan y cu ta impacta directamente siguridad, orden publico y trankilidad den diferente bario.
Durante su bishita na Dakota, minister Dowers a explora solucionnan practico pa detencion di adictonan ambulante cu regularmente ta kibra ley y ta crea situacion di inseguridad den comunidad. A mira posibilidadnan pa haci uzo di un edificio den cura di Centro Dakota cu actualmente no ta den uzo y cu ta ekipa cu varios cel, practicamente cla pa uza. Sinembargo, lo mester studia e factibilidad tecnico y operacional di tal uzo di manera responsabel sin cu esaki afecta e bario.
Minister Dowers a reafirma cu su ministerio lo sigui actua cu determinacion: firme den aplicacion di ley, pero cu un enfoke responsabel y humano. No por sigui ignora e problema di droga y adiccion; e ta rekeri un acercamento integral cu ta combina aplicacion di ley, control, pero tambe colaboracion cu instancianan di salud y rehabilitacion.
