Bintidos trahado di KIA a ricibi certificado di "YOUTURN”
ORANJESTAD - Diabierna 8 di maart 2024, Minister di Husticia y Asunto Social sr. Rocco
Tjon, a haci entrega di certificado na 22 trahado di KIA cu a termina e opleiding di “Youturn”, exitosamente.
“Youturn” ta un metodo cu ta uza den tur instituto coreccional na Hulanda, pa loke ta trata hobennan. Pa algun tempo caba, Centro Ortopedagogico Aruba (OC) ta uzando e metodo aki, mirando e exito cu e esaki a demostra di tin di por guia e hobennan mucho mas miho y yuda nan re-integra y re-socialisa bek den comunidad na un manera exitoso.
Pronto KIA lo introduci un proyecto piloto caminda ta bay traha cu personal fiho na e seccion di hobennan, caminda lo impolementa e metodo di “Youturn”, y brinda miho guia na nos hobennan.
Banda di esaki, a aproba diferente curso, specificamente pa nos hobennan. Ta trata di un lista grandi caminda lo tin mas di shen cupo y opleiding pa detenidonan por participa na diferente
curso cu tin di haber cu entrepeneurship, enseñansa y mas.
Minister Tjon ta satisfecho di wak e colaboracion entre OC y KIA, caminda e psicologo forensico di OC, hunto cu su ekipo, a percura pa brinda e training aki na e personal di KIA, y ta felicita e personal di KIA cu a obtene e certificado. Un inversion den e desaroyo profesional di esnan cu ta labora bou di Ministerio di Husticia y Asuntonan Social ta hopi valioso.