BID a celebra 73 aña di existencia, dedicacion y servicio na Gobierno di Aruba
ORANJESTAD – Recientemente Bureau Interne Diensten (BID)a celebra su 73 aña di existencia.
BID a keda funda na aña 1953 como un departamento di registracion y distribuicion. BID a evoluciona durante mas di shete decada pa bira un departamento esencial pa e funcionamento di Gobierno di Aruba.
Bureau Interne Diensten (Servicio Interno di Gobierno) ta manera e nomber mes ta bisa, un departamento cu principalmente ta brinda servicio na e otro departamentonan di gobierno. E tarea primordial di BID ta percura pa e registro, maneho, distribucion y conservacion di documentacion oficial.
BID ta tambe e instancia oficial dentro di gobierno na unda mester dirigi tur corespondencia pa Ministronan pa registracion. BID ta percura tambe pa manda carta Decreto nacional, Decision di Ministro y contract.
Minister di Vivienda, Infrastructura, Servicio Interno y Telecomunicacion, Rene Herdé, a celebra hunto cu directiva, personal y invitadonan, BID su di 73 aña di existencia.
Durante su discurso, minister Herdé a reconoce e dedicacion di tur generacion di funcionario y directiva cu a contribui na e desaroyo di e institucion.
“BID no solamente ta un departamento cu ta registra y distribui corespondencia, BID ta un wardado di informacion, un fuente di historia institucional y un sosten importante pa e funcionamento di Gobierno,” Minister Herdé a vocifera.
Mas leu di honra su historia, BID ta un vision riba modernisacion y digitalisacion. Entre e iniciativanan tin e implementacion di Decos Join Cloud Server, un sistema central di contacto cu cliente, un helpdesk digital y un archivo centralisa.
E meta ta pa fortalece e maneho di informacion, mehora comunicacion entre departamento y contribui na un Gobierno mas moderno, eficiente y digitalmente conecta.
