Biblioteca Nacional Aruba ta cumpli 75 aniversario y renoba nan logo

Biblioteca Nacional Aruba ta un biblioteca cu ta duna diferente servicio. E ta un biblioteca publico cu ta presta buki y duna informacion na publico, sostene scolnan, conserva patrimonio cultural di Aruba y ta un luga unda ta sostene y promove expresionnan cultural. Trabou di biblioteca na Aruba a desaroya durante añanan como tambe e forma pa warda/conserva material.

Biblioteca a crece hunto cu e comunidad Arubano y ta posiciona su mes fuertemente den cuadro di educacion continuo pa tur. Pa expresa e crecemento, ambiente, conexion cu comunidad a duna e logo un bachi nobo. Muy en particular e font y e colornan.

E forma a keda mes cos, como cu esey ta hopi conoci caba. E blokinan ta representa lomba di buki y un mundo di buki y informacion.

E logo ta diseña na un manera, pa apela na tur grupo meta. E blokinan: ta expresa cu Biblioteca ta yuda construi y contribui na un comunidad bon informa. Pensa por ehempel na construccion di un Centro di Informacion completo, contribui na engrandece conocimento en general y contribui na informa tur miembro di comunidad.
E letranan ta duna un efecto fluido, habri, flexibel y suave. E colornan ta moderno, yen di energia, bibo y ta hala atencion.