Biblioteca Nacional Aruba finalmente ta haya su base huridico y organisatorio despues di un trayecto cu a inicia na aña 2008
ORANJESTAD – Ministerio di Relacionnan den Reino, Enseñansa, Hubentud, Innovacion y Deporte ta anuncia cu Biblioteca Nacional di Aruba (BNA) finalmente ta conta cu e base huridico y organisatorio cu ta coresponde cu su funcion y responsabilidad como biblioteca nacional di Aruba.
Biblioteca Nacional Aruba (BNA) a keda formalmente establece pa medio di un Landsbesluit. Desde 2008 e procedura pa cu e formalisacion di Biblioteca Nacional Aruba ta canando.
E logro aki ta haya un significado ainda mas special den 2026, ta e aña cu Biblioteca Nacional Aruba ta celebra 40 aña di existencia. Riba 3 di maart 1986, cu entrada di Aruba su Status Aparte, Biblioteca Publico Aruba a cambia oficialmente su nomber pa Biblioteca Nacional Aruba. Desde e momento ey, BNA a sigui cumpli den practica cu su rol como biblioteca nacional, pero e formalisacion necesario di su posicion organisatorio a keda pendiente.
Cu aprobacion di e Landsbesluit y e rapport di formacion, a regularisa e situacion aki finalmente, creando un base formal pa BNA sigui desaroya su funcion den servicio di comunidad Arubano.
Di Relacionnan den Reino, Enseñansa, Hubentud, Innovacion y Deporte, Sra. mr. Gerlien Croes, ta considera esaki un paso importante, no solamente pa BNA como institucion, sino tambe pa enseñansa, cultura y preservacion di patrimonio di Aruba.
“Despues di un trayecto di 18 aña, nos ta logra completa un proceso importante pa un institucion cu durante decadanan ta sirbiendo nos comunidad. Biblioteca Nacional Aruba ta merece e base huridico y organisatorio necesario pa por sigui cumpli cu su rol importante, tanto awe como den futuro,” Minister Gerlien Croes a expresa.
Un biblioteca nacional ta mucho mas cu un edificio cu buki. E ta un institucion cu ta democratisa acceso na conocemento y informacion, sin distincion di origen of situacion socioeconomico. E ta sostene enseñansa, stimula lesamento y desaroyo, y na mes momento ta carga e responsabilidad importante di conserva memoria colectivo y herencia cultural di Aruba.
Ademas, BNA ta ofrece un espacio publico, accesibel y sigur caminda muchanan, hobennan y adultonan por siña, descubri, investiga y encontra otro.
Segun Minister Croes, e formalisacion aki ta crea un fundeshi mas fuerte pa BNA sigui evoluciona hunto cu necesidadnan di un sociedad moderno, sin perde su funcion esencial como guardian di conocemento y patrimonio nacional. Ademas ta gradici tur esnan cu, durante e añanan, a contribui na e proceso largo pa yega na e momento aki, y particularmente e personal di Biblioteca Nacional Aruba pa nan compromiso continuo cu comunidad.