Ban Bek Caya ta bolbe: Prome edicion 2026 lo ta diabierna awo 30 di januari

Ban Bek Caya ta un iniciativa di Gobierno cu e meta pa trece bida bek den Caya Grandi y duna un impulso economico na e comerciantenan estableci den e zona. Cada edicion ta bira mas grandi, y e efecto positivo ta bira mas visibel pa tur partner envolvi.

Edicion aki lo ta un manifestacion cultural cu realse riba e Bon Comun colectivo. Ademas cu lo haci un invitacion na tur nos bishitantenan, lo inclui tambe oradornan presente riba nos ilsa pa e Expo y Conferencia Common Good pa forma parti di e evento aki den centro di nos ciudad.

Durante e ultimo edicion, hopi persona a probecha di e orario y e ambiente festivo pa haci nan compras y disfruta di e bon ofertanan cu mayoria di comerciante a presenta. Diferente tienda a prepara nan mes pa brinda un miho experencia na cliente, adaptando nan local y creando espacio parti pafo pa sinta, come y disfruta di ambiente y famia den centro di ciudad.

E comunidad ta invita pa e prome edicion di Ban Bek Caya pa 2026, cu lo tuma luga diabierna 30 di januari, di 6:00 pm te 10:00 pm. Un anochi di compras, ambiente, cuminda y convivencia den centro di ciudad.