Awenochi ta transimiti e di 5 episodio di e podcast “Cadushi ta zona cu Dyrick”

E serie di podcast yama “Cadushi ta zona cu Dyrick” a lanta interes positivo bou di nos comunidad na unda e invitadonan ta comparti hopi informacion valioso di nos naturalesa.

E ‘host’ Dyrick Wouters un hoben dinamico cu pasion pa Aruba su cultura y naturalesa a capta atencion di hopi hende caba. E manera con e hoben ta presenta su mes ta uno dinamico. E ta sinta na mesa pa combersa cu diferente stakeholder di nos comunidad cu ta conecta di un manera of otro cu nos naturalesa y otro topiconan importante.

Manera menciona, awe diahuebs 22 di mei pa 7:00 di anochi e di 5 episodio ta disponibel riba rednan social y riba bo plataforma di podcast preferi. 
Como invitadonan pa hiba un combersacion interesante y ameno cu Dyraick, ta bin sra. Liesje Proveyer, di departamento di sondeo (onderzoekleider) na Departamento di Cultura Aruba (DCA) y sr. Harold Kelly Arkeologo di Museo Arkeologico Nacional Aruba (MANA).

E combersacion ta bay riba e topico; Con Naturalesa ta duna un aporte na aumento di nos autenticidad. Kico naturalesa ta aporta cune, pa nos ta con y ken nos ta realmente.

Pueblo di Aruba ta keda invita pa subscribi na e canalnan social di DNM pero tambe riba plataforma di podcast asina no perde e siguiente episodionan di “Cadushi ta zona cu Dyrick”.  E serie mas educativo actualmente aki na Aruba, esaki tambe a cuminsa riba Canal 23 di TeleAruba. Pues nos televidentenan cu no tin acceso na e plataformanan online por wak esaki awor via Television.

DNM y programa “Cadushi ta zona cu Dyrick” ta gradici Sra. Liesje Proveyer, di DCA y sr. Harold Kelly di MANA pa nan cooperacion y pa comparti nan experticio y conocemento cu pueblo di Aruba en general.

DNM ta invita un y tur pa sintonisa e episodio aki y esunan cu ta sigui, cada 2 siman un episodio nobo cu temanan cu ta yega cerca un y tur, nos naturalesa, y con nos ta dune’e su balor pa incorpora e importancia di esaki den nos bida diario.