A.T.A. ta comparti resultado di september 2026 y di estudio tocante Aruba como destinacion pa casamento
ORANJESTAD - Aruba Tourism Authority (A.T.A.) a laga realisa e estudio “Saying ‘I Do’ to the Business of Aruba Weddings” pa analisa e mercado di casamento y luna di miel, e preferencianan di parehanan y e impacto economico cu e industria aki por genera.
E estudio ta mustra cu Aruba tin cualidadnan fuerte manera ambiente romantico y exclusivo, luganan unico, siguridad, clima confiabel y un industria di casamento cu añanan di experiencia, cu hotelnan y profesionalnan estableci cu ta brinda un servicio profesional y confiabel.
E resultado ta indica un oportunidad importante pa Aruba sigui crece den e mercado aki:
- Pareha cu ta casa: ta gasta un promedio di USD 27.000
- Invitado na e casamento: ta gasta aproximadamente USD 4.000
- Biahero di luna di miel: ta gasta un promedio di USD 10.500.
Ademas, e estudio ta mustra cu casamento moderno ta inclui mas actividad durante varios dia, creando oportunidad pa acomodacion, gastronomia, excursion, transporte y otro servicio local.
Sostenibilidad ta presenta otro oportunidad importante pa Aruba. E estudio ta mustra cu parehanan ta duna balor na sosten pa comunidad local, proteccion di medio ambiente y respet pa cultura local, mientras cu parehanan cu mayor poder di compra ta dispuesto pa paga entre 30% y 50% mas pa opcionnan sostenibel cu ta substancia y ta haci impacto. Esaki ta brinda Aruba oportunidad pa sigui desaroya e industria di casamento di manera cu ta crea balor tanto pa e bishitante como pa nos isla. Asina, Aruba por sigui fortalece su posicion como un destinacion atractivo pa casamento, combinando calidad, sostenibilidad y e experiencia unico cu nos isla tin di ofrece.
ESTADISTICANAN CONFORME ACTUALISACION DEN E INDUSTRIA DI TURISMO STAYOVER, ESTADIA Y PARTICIPACION DI MERCADO
Den luna di september 2026, Aruba a ricibi un total di 114.517 bishitante stayover y a registra 761.557 nochi di estadia, cu un promedio di estadia (Average Length of Stay - ALOS) di 6,7 anochi.
E distribucion di mercado durante september a mustra cu:
- Norte America: Ta keda e mercado principal, representando 64.6% di tur yegadanan. Estados Unidos tabata e mercado individual mas grandi pa e luna di september cu 70.682 bishitante,.
- Sur America: a contribui cu 27.7%, lidera pa Argentina cu a registra 14.986 bishitante
- Europa: a representa5.0% di yegada. Hulanda a lidera e mercado Europeo cu 2.769 bishitante.
- Otro regionnan: a representa 2.7% di total di bishitantenan.
SHORT-TERM VACATION RENTALS (STVR)
A.T.A. ta sigui monitorea e sector di Short-Term Vacation Rentals (STVR) pa medio di e plataforma Lighthouse. Pa september 2026:
- Nivel promedio di ocupacion: registra 51% ;
- Average Daily Rate (ADR): USD 323;
- Entrada total: USD 24.657.396.