A.T.A. ta celebra: A anuncia Jordan Schlipken entre e miho gerentenan di Colombia
ORANJESTAD — Aruba Tourism Authority (A.T.A.) ta orguyoso di anuncia cu Jordan Schlipken-Croes, Area Director pa Latino America, a haya reconocemento pa revista Gerente como un di e top managernan di Colombia.
E reconocemento ta bin na momento cu Colombia a bira e mercado di fuente di turismo mas grandi di Aruba na 2024, cu un crecemento record di 25% compara ku 2023. Bou di liderazgo di Schlipken-Croes, Aruba a fortalece su posicion riba mercado den Latino America, dunando bon bini na 182.000 biahero for di e region, un aumento di 38%, esun mas halto den añanan recien.
Un factor clave den e exito aki tabata e expansion di conectividad aereo. Trahando cu Aruba Airport Authority y partnernan regional, Schlipken-Croes a yuda sigura rutanan nobo cu LATAM Airlines (Lima–Aruba) y GOL Airlines (São Paulo–Aruba), mientras cu partnernan existente manera Avianca y Copa Airlines a amplia nan frecuencianan. Entre 2022 y 2025, e esfuersonan aki a resulta den un aumento di 52% den asientonan disponibel di aerolinea for di Latino America pa Aruba.
"E decision mas transformativo tabata cambia e strategia regional pa amplia conectividad aereo. Esaki no solamente a trece Latino Americanonan mas cerca di Aruba, pero tambe a impulsa e desaroyo economico di e isla, di cual turismo ta representa 80% di e GDP”, asina e hoben ehecutivo a conta e revista Colombiano.
Ademas di turismo, Schlipken-Croes a posiciona Aruba como un hub empresarial y cultural, fomentando lasonan a traves di e Camaranan di Comercio Colombiano-Hulandes y Peruano-Hulandes.
Pa Schlipken, liderazgo no ta nifica solamente logra metanan di negoshi: "Cada esfuerso ta bay mas leu di genera entrada of bende un producto. E tin di haber mas bien con nos trabou ta impacta e comunidad Rubiano directamente. Turismo ta bienestar pa su hende y esaki ta loke ta motiva mi ekipo”, asina el a comenta.
Cu resultadonan record y un vision regional cla, Schlipken-Croes ta sigui hunga un rol clave pa fortalece posicion di Aruba den Latino America y mas leu.
Tocante Jordan Schlipken-Croes
Jordan Schlipken-Croes a cuminsa traha na A.T.A. na 2017 na Bogotá, manehando seis mercado den henter Latino America. Despues di a haya experencia internacional na Panama, el a regresa na 2021 y a promove como Area Director di henter Latino America na 2022. Desde e tempo ey, el a surpasa su metanan consistentemente, y a kibra record di cantidad di turista y vuelonan di e region aki pa Aruba.