Aruba y Hulanda ta anuncia desmantelacion y redestinacion di ex refineria di Lago

Lo desmantela  completamente e ex-Refineria di Lago na San Nicolas y re-destina e tereno pa un desaroyo sostenibel y inclusivo.

“Pa casi un siglo, e refineria tabata curason di e era industrial di Aruba”, segun Prome Minister Eman. "Generacionnan di Arubiano a construi nan bida rond di e planta aki. Pero futuro ta exigi curashi. Awe, nos ta cera e capitulo ey no solamente cu recuerdonan di e contribucion di e refineria, pero mas cu tur cos cu conviccion, pa habri un capitulo nobo di innovacion, sostenibilidad, y e bienestar comun."

E refineria tambe a hunga un papel crucial den historia di mundo. Durante Segundo Guera Mundial, e Refineria di Lago na Aruba tabata un di e proveedornan mas importante di combustibel pa e Forsanan Aliado, dunando asina un contribucion significativo na liberacion di Europa y Hulanda. E nifikacion historico aki ta haci e momento di transformacion aki mas special ainda.

Gobierno di Aruba a pidi formalmente asistencia tecnico di gobierno Hulandes pa desmantelacion y saneamento di e sitio, y pa preparacion di destahonan internacional pa redesaroyo di e area.

Premier Schoof, kende a yega Aruba directamente for di COP30, a elogia e decision como un paso balente y visionario cu ta transforma pasado den futuro.

“Aruba ta demostrando liderazgo transformando loke un tempo tabata suministra mundo cu energia den un fuente di restauracion,” Schoof a bisa.

Gobierno Hulandes ta procesando e peticion di Aruba pa asistencia tecnico y tambe lo contribui cu €50 miyon di un fondo special di transicion di energia pa fortificacion y modernisacion di e red di coriente y infrastructura di energia sostenibel. 

E redesaroyo di e sitio extenso di Refineria di Aruba (RDA) ta ofrece e perspectiva di transforma San Nicolas den un centro pa energia limpi, innovacion maritimo, industria circular, vivienda, cultura, y infrastructura berde, cu ta alinea cu e vision di bienestar comun y prosperidad sostenibel.

Pa guia exitosamente e proyecto di varios aña aki, gobierno di Aruba, cu apoyo di Hulanda, tin pensa di establece un structura robusto pa maneho, coordinacion, y transparencia di henter e proceso di desmantelacion y re-desaroyo. E structura aki lo percura pa e proyecto cumpli cu e normanan internacional di mas halto di siguridad, proteccion di medio ambiente y calidad institucional.