Aruba Tourism Authority y Aruba Ports Authority N.V. a yama bonbini na tres crucero durante nan bishita inaugural: Independence of the Seas, Sapphire Princess y Wonder of the Seas
ORANJESTAD - Recientemente Aruba a yama bonbini na tres crucero durante nan bishita inaugural na nos isla: Independence of the Seas, Sapphire Princess y Wonder of the Seas, riba 3, 9 y 13 di november, respectivamente.
A conmemora e bishitanan inaugural cu ceremonianan tradicional di intercambio di plakkaat. Esaki ta un tradicion maritimo importante cu ta reconoce e prome bishita di un barco na un destinacion y ta simbolisa e relacion entre companianan di crucero y e destinacionnan.
Durante e ceremonianan, representantenan di Aruba Tourism Authority (A.T.A.), Aruba Ports Authority N.V. (APA), agentenan local di waf y e diferente ekiponan di e cruceronan tabata presente. E e capitannan y oficialnan superior di e cruceronan a ricibie delegacionnan abordo. E capitannan tabata Iv Vidov di Independence of the Seas, Aldo Traverso di Sapphire Princess y Srecko Ban di Wonder of the Seas.
Cada un di e cruceronan ta representa un segmento diferente den e industria internacional di crucero. Independence of the Seas, opera pa Royal Caribbean International, ta un barco di clase Freedom cu capacidad pa aproximadamente 3,900 huesped. E crucero ta conoci pa su experiencianan pa henter famia, entretenimento y aventura na lama, incluyendo su simulador di surf FlowRider, pista di patina riba ijs, muraya di rock-climbing y entretenimento estilo Broadway.
Sapphire Princess, opera pa Princess Cruises, tin capacidad pa aproximadamente 2,680 huesped y e crucero ta conoci pa su ambiente elegante abordo, diseño espacioso y experiencianan premium, incluyendo diferente opcion di cuminda, entretenimento, programanan educativo y areanan cu bunita bista.
Finalmente, Wonder of the Seas, opera pa Royal Caribbean International, ta uno di e cruceronan mas grandi na mundo. Cu un capacidad pa mas cu 5,700 huesped, e barco di clase Oasis tin ocho espacio distinto, facilidadnan di entretenimento amplio y un gran variedad di experiencia abordo. Wonder of the Seas ta conoci pa su diseño innovativo, experiencianan pa henter famia y entretenimento di nivel mundial, incluyendo Central Park, e glijbaan Ultimate Abyss, AquaTheater y un variedad di opcion di cuminda y entretenimento.
E bishitanan inaugural aki ta refleha Aruba su compromiso continuo cu su socionan internacional den industria di crucero y e importancia di mantene relacionnan fuerte den e sector.
Pa medio di colaboracion entre A.T.A., APA N.V., companianan di crucero y stakeholdernan local, Aruba ta sigui enfoca riba brinda experiencianan di calidad na bishitantenan, mientras ta promove turismo di crucero responsabel y sostenibel.
Aruba Tourism Authority y Aruba Ports Authority N.V. a yama bonbini na tres crucero durante nan bishita inaugural: Independence of the Seas, Sapphire Princess y Wonder of the Seas.
Comparti
- Comparti e pagina aki riba LinkedIn
- Comparti e pagina aki riba X
- Comparti e pagina aki riba Facebook
- Comparti e pagina aki riba WhatsApp
- Comparti e pagina Aruba Tourism Authority y Aruba Ports Authority N.V. a yama bonbini na tres crucero durante nan bishita inaugural: Independence of the Seas, Sapphire Princess y Wonder of the Seas via email
