Aruba ta inicia Proyecto Cunucu Butucu pa fortalece produccion local y siguridad alimenticio

Cu e proyecto aki, Gobierno kier crea condicionnan pa agricultor y criador di bestia por produci na un manera mas eficiente, sostenibel y comercial. E meta ta pa aumenta produccion local, fortalece siguridad alimenticio, crea actividad economico y reduci gradualmente e dependencia grandi di Aruba riba importacion di cuminda. 

Riba 18 di september Conseho di Minister a aproba Proyecto Cunucu Butucu. Cu e aprobacion aki, gobierno a duna luz berde pa sigui cu preparacion y ehecucion di e proyecto.

E esencia di Proyecto Cunucu Butucu ta pa fortalece sector primario di Aruba, creando espacio pa agricultornan y criadornan di bestia por dispone di tereno pa produccion local. Esaki ta nificia cu cada participante lo haya un pidi tereno den Cunucu Butucu. Banda di esaki, Gobierno lo inverti den e infrastructura y facilidadnan necesario pa crea condicionnan adecuado pa produccion, incluyendo entre otro suministro di awa, energia sostenibel, facilidadnan pa procesa y mihor acceso na mercado. Asina, hunto ta traha pa Cunucu Butucu bira un area strategico di produccion agricola cu ta contribui na siguridad alimentario y diversificacion economico di Aruba.

E proyecto ta complementa Agri-Innovation Park: mientras cu AIP ta enfoca riba cultivo tecnologico, Cunucu Butucu lo crea espacio pa agricultura den tera, criamento di bestia, procesamento, innovacion y acceso na mercado.

Ta un realidad cu Aruba ta importa alrededor di 99% di tur producto alimenticio cu ta consumi. E dependencia aki ta haci nos pais vulnerabel pa crisis internacional, interupcion den cadena di suministro y aumento di prijs. Agricultor y criadornan di bestia local, ademas, ta enfrenta reto manera falta di tereno adecuado y pagabel, costo halto di awa y cuminda pa bestia, acceso limita na mercado y falta di asistencia tecnico. Proyecto Cunucu Butucu ta busca atende e retonan aki mediante un plan integral y realistico den cooperacion cu tur partnernan relevante.

Proyecto Cunucu Butucu ta encera entre otro:

• investiga posibilidad pa un sistema confiabel y pagabel di awa, combina cu uzo y almacenamento di awa di yobida;
• generacion di energia limpi, entre otro mediante energia solar;
• zonificacion pa agricultura, criamento di bestia y procesamento di product;
• un centro pa compost, vermicultura y produccion di blokinan di alimento pa bestia;
• un mercado central por mayor pa venta di producto local; 
• un centro di cooperacion, capacitacion y conocemento, den colaboracion cu DLVV Santa Rosa.

Como prome paso, lo instala e Werkgroep Cunucu Butucu. E werkgroep tin como tarea coordina e preparacion, vigila progreso y segura dialogo continuo cu e sector.