Aruba ta despedi di un pionero di turismo Roderick ‘Rory’ Gilbert Arends

Entre famia, amigo, destacadonan den sector turistico, Prome Minister mr. Mike Eman, hunto cu Minister di Turismo mr. Wendrick Cicilia, amigonan y famia, a rindi respet y honor na bida di un persona, cu den su trayectoria a laga un legado impresionante atras.

Riba 30 di juni ultimo Aruba a keda sorprendi cu e noticia di fayecimento di e “doctor di turismo”, Sr. Roderick Gilbert Arends. Miho conoci como Rory. 

Minister Wendrick Cicilia como mandatario cu e cartera di turismo, a expresa cu como generacion nobo, e ta honra e bida di un pionero cu a nifica asina hopi pa pais Aruba. Cu gratitud pa tur locual cu ta construi awe riba e fundeshi fuerte cu nos pionero-  y legendarionan cu hopi sacrificio, a laga pa nos.

Rory tabata un personahe ehemplar y respeta p’e industria di turismo. A sirbi como ex-presidente y CEO di AHATA durante e periodo di aña 1990 pa aña 2000. Ademas a desplega un bunita trabou como director na Aruba Tourism Bureau (ATB) durante e periodo di 1985 te cu 1989. Rory tabata un pionero den e transformacion di ATB pa ATA.  

Prome Minister Mike Eman a hiba palabra na despedida di un persona cu a para na cuna di e organisacion di turismo di Aruba. Awe a despedi di dje, pero ta para keto un rato y cu sentido di merito pa locual Sr. Rory Arends a nifica pa e industria aki. Si tin un hende cu a biba cu e amabilidad y hospitalidad cu ta representa nos rond mundo, tabata Rory Arends. 

Gobierno di Aruba ta desea forsa y profundo condolencia na famia y tur cu a stima Rory. Rory ta laga un legado impresionante atras pa tur cu ta sigui sirbi den e sector mas importante di nos pais y a haci esaki fielmente pa mas cu trinta aña.  

Cu Sr. Roderick Gilbert Arends, sosega na paz.