Aruba Ta Anfitrion di Training di Nivel Halto di Sancionnan di UE pa Instancianan di Gobierno
ORANJESTAD – Departamento di Relacionnan Exterior (DBB) ta anuncia cu e seminario ehecutivo titula “EU Sanctions in Practice: Effectiveness, Judicial Review, and Compliance” ta tumando lugar riba 3 y 4 di november 2025.
E training aki, organisa pa DBB y ehecuta pa European University Institute (EUI), ta trece hunto den un solo lugar, expertonan legal y UE, profesionalnan riba tereno di cumplimento (compliance) pa fortifica e capacidad institucional di Aruba pa mantene su mes na e regimennan di sancion internacional.
Prome Minister Mike Eman a hiba palabra y a habri e training oficialmente. Directora di Departamento di Relacionnan Exterior, Sra. Jocelyne Croes, a yama un bon bini na e trainers na Aruba y a agradece e participantenan pa nan compromiso.
E training ta parti di un esfuerso mas amplio pa garantisa cu Aruba ta prepara y resiliente den un panorama geopolitico cu ta cambia hopi lihe. Como parti di Reino Hulandes, Aruba tin un obligacion constitucional y huridico pa sostene e orden legal internacional, incluyendo implementacion efectivo di sancionnan di Union Europeo.
EUI, pa medio di su Florence School of Transnational Governance, ta reconoci globalmente pa su experticio den politica di sancion, cuadro legal y mecanismonan di cumplimento. E programa ta ekipa participantenan cu hermentnan analitico y practico pa compronde e dimensionnan politico, huridico y economico di e sancionnan. Alabes e tin un enfoke en particular riba e medidanan restrictivo di Union Europeo riba e crisisnan mundial manera e guera na Ukraina.
E training ta dirigi na funcionario trahando na ministerionan y institucionnan di Aruba, incluyendo Relaciones Exterior, Ministerio Publico (OM), Directie Financien, Banco Central di Aruba, Unidad di Inteligencia Financiero (FIU Aruba), Directie Luchtvaart, Directie Scheepvaart y Departamento di Aduana.
Temanan cubri ta:
- E meta, impacto y limitacionnan di sancionnan;
- tumamento di decision den EU y mecanismonan di cumplimento huridico;
- revision hudicial y derechonan di procedemento;
- strategianan di cumplimento y medida pa preveni bypass di sancionnan.
Den e ambiente mundial di awendia, sancionnan no ta hermentnan excepcional mas, nan ta instrumento central den gobernacion internacional. Cu tension geopolitico creciendo y regimen di sancionnan ampliando, ta esencial cu institucionnan di Aruba ta prepara pa responde eficazmente pa garantisa cumplimento legal y mantene integridad financiero.
E iniciativa aki ta refleha un postura proactivo di Aruba pa fortelece su marco legal y politico y su compromiso pa keda un socio responsabel y confiabel tanto den Reino como den e comunidad internacional.
Departamento di Relacionnan Exterior ta extende su gratitud na Banco Central di Aruba y FIU Aruba pa nan sosten y partnership generoso pa haci e training aki posibel. Nan dedicacion na preparacion institucional y integridad huridico ta refleha e compromiso di Aruba den cooperacion global.
Pa mas informacion tocante e programa di training riba sancionnan di EUI, bishita: EUI – Making Sanctions Work.
