Anochi di informacion di Arubalening
ORANJESTAD - Departamento di Enseñansa Aruba (DEA), seccion Studiefaciliteiten, ta recorda studiantenan cu ta desea di bin na remarca pa un Arubalening entrante augustus 2026 cu mester cuminsa na tempo cu e proceso di aplicacion.
Pa yuda cu e proceso aki ta organisa un anochi di informacion tocante Arubalening diahuebs 29 di januari proximo. Esaki lo tuma luga den MFR 1 y 2 na Departamento di Enseñansa Aruba na Stadionweg 37 y lo cuminsa pa 7or di anochi.
E anochi di informacion aki ta specialmente pa studiantenan cu ta desea di cuminsa studia cu Arubelening, sea e aña aki of den futuro. Ta recomenda studiantenan den voorexamen klas y examen klas pa asisti na e anochi di informacion aki. Mayornan tambe ta mas cu bonbini.
Ta pidi e studiantenan pa registra pa un di e anochinan di informacion den e siguiente link:
Mas informacion
Pa cualkier pregunta relaciona cu Arubalening por manda un email na arubalening@ea.aw of un whatsapp na 594-4140.
Pa mas informacion por consulta e Portal di Arubalening. Tambe ta sugeri studiantenan pa sigui Departamento di Enseñansa Aruba riba Facebook y/of Instagram @EducationAruba pa keda na altura di tur informacion.
