Aerolíneas Argentinas ta lansa servicio directo nobo entre Argentina y Aruba

Aruba a dal un stap grandi pa dilanti den su strategia di conectividad aereo Latino Americano cu e lansamento di e servicio directo nobo di Aerolíneas Argentinas entre Argentina y Aruba.

E vuelo inaugural a sali for di Aeropuerto Internacional Ezeiza (EZE) cu tur 170 asiento completamente ocupa, reflehando e demanda fuerte di mercado y un contesta sumamente positivo di parti di e biaheronan Argentino.

Pa celebra formalmente e momento, tabatin un ceremonia inaugural cu a tuma luga riba dia 8 di januari, na Aeropuerto di Aruba, treciendo hunto e stakeholdernan clave di gobierno, aviacion y turismo. E evento a conta cu remarkenan oficial di Minister di Turismo, Transporte y Labor, mr. Wendrick Cicilia, como tambe discurso di Ronella Croes, CEO di Aruba Tourism Authority (A.T.A.) y Jo-Anne Arends, Aviation Business Development Executive na Aruba Airport Authority. E celebracion a conclui cu un ceremonia tradicional di cortamento di cinta y cortamento di bolo, oficialmente yamando bonbini na Aerolíneas Argentinas na Aruba.

Originalmente anuncia como un ruta cu lo opera pa dos luna, e rendimento fuerte trempan di e ruta a pone cu Aerolíneas Argentinas a extende e servicio te cu fin di september 2026, manteniendo vuelonan regular for di Buenos Aires y Córdoba. Esaki ta representa un lansamento sumamente unico, cu e compania di aviacion ta introduci e servicio nobo simultaneamente for di tres aeropuerto.

E compania di aviacion ta opera e ruta cinco biaha pa siman uzando un Boeing 737 MAX 8 (170 asiento), ofreciendo mas cu 7.000 asiento den 43 vuelo durante e temporada inicial. E servicio ta representa un paso strategico pa fortalece presencia di Aruba den Latino America y diversifica su red di ruta mas leu cu Norte America.

Structura di ruta (januari - februari 2026)

• Buenos Aires (EZE) – tres vuelo sin stop semanal pa Aruba, regresando via Córdoba (COR)
• Buenos Aires (AEP) via Córdoba (COR) – un buelo seminal
• Buenos Aires (AEP) via Mendoza (MDZ) – un buelo semanal

E orario di vuelo ta diseña pa coincidi cu e periodo di vakantie di zomer di Argentina, permitiendo e biaheronan cuminsa disfruta for di e momento cu nan yega. For di Ezeiza, vuelonan di anochi ta sali 23:55, yegando Aruba pa 07:00, cu vuelonan di regreso saliendo di Aruba pa 08:30 y yegando Buenos Aires pa 18:45, sigui pa un estadia cortico na Córdoba.

Argentina ta sigui surgi como un mercado clave di crecemento pa Aruba. A base di datonan di origen-y-destinacion di januari pa september 2025, Argentina ta clasifica como e di dos mercado Latino Americano mas grandi di Aruba, cu ta conta pa 13.8% di e trafico regional total. Buenos Aires (EZE) ta lidera cu un parti di mercado di 6.5%, sigui pa Aeroparque (AEP) na 3.8% y Córdoba (COR) na 1.7%, enfatisando e balor strategico di e diseño di e ruta multi-city di Aerolíneas Argentinas.

Di acuerdo cu e actualisacion mensual di luna di november 2025 di Aruba Tourism Authority, e yegada di bishitante for di Argentina a aumenta cu 154.9% year-to-date (YTD) di november 2025 compara cu e mesun periodo na 2024. Argentina awo ta representa 4.7% di tur bishitante di Aruba, subiendo for di 1.9% YTD november 2024 y ta conta pa 30.3% di tur yegada Sur Americano, casi redoblando su participacion aña tras di aña.

Ademas e biaheronan Argentino ta entre e huespednan di balor di mas halto na Aruba. E duracion promedio di estadia a aumenta cu 147% aña tras di aña, yegando 8.4 anochi YTD november 2025, haciendo Argentina e di dos mercado Sur Americano mas halto pa duracion di estadia.

Schedule di vuelo 

Buenos Aires (EZE) – Aruba (AUA)

Buenos Aires (AEP) – Cordoba (COR) – Aruba (AUA)

Buenos Aires (AEP) – Mendoza (MDZ) – Aruba (AUA)