ACM Hulanda colaborando cu AFTA den desaroyo di precondicionnan pa e maneho di competencia

Recientemente un experto di ACM riba tereno di competencia, a bin Aruba pa asisti AFTA den desaroyo di precondicionnan pa e maneho di competencia. E trabou di e experto aki lo dura tres luna y despues otro experto lo bin Aruba pa sigui brinda asistencia na AFTA riba otro area di trabou. TWO-Hulanda ta financia e asistencia di e expertonan, cual lo fortifica e funcionamento di AFTA.

Dia 1 di december 2023, Minister di Asunto Economico, Comunicacion y Desaroyo Sostenibel, mr. Geoffrey Wever, a inaugura Aruba Fair Trade Authority den centro di Oranjestad y 1 januari 2024 e Ley di AFTA tambe a bay na vigor pa asina AFTA por inicia su tareanan.

AFTA, como un organisacion independiente (zelfstandig bestuursorgaan), cu su mesun directiva, tin como tarea principal e ehecucion di e ley di ordenansa nacional encuanto competencia husto (mededingingsverordening). E meta di e ordenansa nacional di competencia husto ta pa garantisa un desaroyo economico husto y stipula regla encuanto acuerdonan cu ta limita competencia (mededingingsafspraken) y posicion di poder (machtspositie), como tambe stipula regla pa cu supervision riba concentracion di empresanan.

Fin di januari 2024, Minister Geoffrey Wever a biaha pa Hulanda y reuni cu expertonan Hulandes di Autoriteit Consumenten en Markt (ACM) over diferente area di colaboracion. Tambe a inicia e preparacionnan di e ley pa inclui proteccion di consumido bou di AFTA su responsabilidad. E ley aki ta den fase final di preparacion cu intencion cu pa 2025 AFTA lo tin e responsabilidad adicional pa reglamenta y informa riba tereno di proteccion di consumidor.

Pa mas informacion over di e responsabilidadnan y tareanan di Aruba Fair Trade Authority, por bishita nan webiste www.afta.aw