Accion di Bario ta continua na Jaburibari
ORANJESTAD - Accion di Bario tin e meta pa incentiva e habitantenan pa reconoce cierto problema y brinda nan e hermentnan pa por yuda soluciona esakinan den forma colectivo como habitante di e barionan.
Riba 19 di juli, e ekipo di Accion di Bario a bishita e bario di Jaburibari, caminda a topa cu e habitantenan y pone man hunto pa rebiba e area neglisha.
E maneho pa reforestacion di nos isla tambe ta forma parti den e programa di Accion di Bario. E reforestacion lo bira un proyecto nacional cu diferente partner formando parti di dje. Pa e motibo aki, Prome Minister a planta un mata di Fofoti na entrada di Parke Curason na Jaburibari.
Accion den Bario ta consisti di un grupo di instancianan manera DOW, Serlimar, Bureau City Inspector, GKMB, Polis di Bario y Sociale Zaken, cu hunto cu Prome Minister, Mike Eman, ta cana den bario y atende cu varios problema cu ta encontra riba caminda publico.
E compromiso di gobierno ta pa revitalisa nos barionan di manera structura y duradero pa tur hende por biba un bida digno.