A reuni cu PAHO den cuadro di e avansenan pa cu salud mental na Aruba
ORANJESTAD – Riba 15 di mei 2024 a tuma luga un reunion, entre Ministerio di Husticia y Asuntonan Social, Directie Volksgezondheid como tambe Directie Buitenlandse Betrekkingen y dr. Gabriel Vivas Franccesconi kende ta e representante di PAHO pa nos region, acompaña pa su ekipo.
E reunion tawata basa riba e topico di Salud Mental y con Aruba ta atende cu e fenomeno aki.
Dos aña pasa, PAHO a asisti den diseña e roadmap pa Aruba, pa atende cu e aspecto di Salud Mental, cual ta un plan cu ta core di 2021 te cu 2031. Actualmente Aruba tin su “steering committee” cu ta consisti di tur stakeholders di e veld, pa di e forma ey por traha riba e diferente “building blocks” manera legislacion, financiamento, desaroyo profesional di tur e profesionalnan cu ta traha den e veld, pero tambe tene cuenta cu e parti di prevencion. A duna un presentacion amplio di tur e pasonan cu Aruba ta tumando, di cual e feedback cu a ricibi for di PAHO tawata uno positivo, caminda nan ta sumamente satisfecho cu con e ehecucion ta bayendo, compara cu otro paisnan den nos region.
A traha riba diferente palabracion , mirando e desaroyo no solamente na Aruba pero internacionalmente tambe. Lo bay evalua e roadmap actual, hunto cu PAHO, pa adapta esaki na tempo, mirando cu ta trata di un plan di maneho pa e dies añanan nos dilanti. Banda di esaki, tin un investigacion cu a conduci cu yama “STEPS”, e investigacion aki a tene cuenta cu aspectonan di Salud Mental, y a base di e resultadonan aki, lo bay traha un plan di accion di con Aruba lo bay atende cu e diferente hayasgonan cu a trece padilanti.
A haci palabracion cu PAHO pa sigui asisti Aruba den e parti di desaroyo profesional. Pues, e “steering committee” lo haci un “needs assessment” y a base di esaki lo acudi na PAHO pa asina nan por asisti cu diferente otro cursonan y opleiding pa ful e veld. No solamente pa esunnan cu ta atende cu e parti di Salud Mental, pero un atencion multi-sectoral, pa cual motibo e diferente training lo bay pa e sectornan social, hudicial, salubridad publico y tambe di enseñansa.