A recorda tur esnan cu a perde nan bida durante di dos guera mundial den Reino Hulandes
ORANJESTAD – Tur aña riba e fecha di 4 di mei, Reino Hulandes ta recorda esnan cu a fayece durante e di Dos Guera Mundial cu a dura desde aña 1939-1945.
Tin Arubianonan tambe cu a perde nan bida durante e guera cruel aki. E mas conoci tawata Boy Ecury cu a perde su bida na Hulanda, pero tambe tin otro Arubianonan cu a bira victima di e guera aki na Europa y na Aruba. E di Dos Guera Mundial tabata e guera di mas grandi y esun mas mortal den historia cobrando mas di 70 miyon victima y tawatin mas di 60 pais envolvi.
Na Aruba e conmemoracion a consisti di un oracion di e religioso militar, ponemento di krans door di Gobernador, un discurso di Ministro-Presidente, ponemento di krans na nomber di famia di e fayecidonan y ex-combatantenan, na nomber di Parlamento, na nomber di Gobierno, na nomber di Representacion di Hulanda na Aruba, na nomber di personal y militarnan di marinierskazerne Savaneta y na nomber di e hubentud di Aruba. E programa a tuma lugar na e monumento situa na Adriaan Lacle Boulevard.
Prome Minister Mike Eman, durante su discurso, a yama pa un renobacion di union y pa pone e balornan humano universal na centro como respuesta na e menasanan di e temponan aki.
“No ta arma ta protehe nos” Premier Eman a remarca, “sino e virtudnan cu nos ta comparti: fe, speransa y amor.”
Tambe a para keto na sufrimento di e pueblo Hudiu, cu un recuerdo personal di su mama y un amiga stima di famia: Señora Engels, miho conoci como Tante Jet – un sobreviviente di e Holocausto. “Na su brasa tabatin un number, cu a trata di kita su humanidad. Pero e tabata bal hopi mas cu esey. E tabata yen di amor, balente y entrega su bida cu gratitud.”
Na nomber di gobierno di Aruba, Premier Eman a expresa su gran gratitud pa tur esnan cu a lucha pa libertad di Aruba y Reino Hulandes. Specialmente na famia di heroe di resistencia Boy Ecury, y na representante di Camarada Aruba y Schutterij Arubano.
Tambe a dirigi palabra directamente na e generacion hoben:
“Boso ta e guardianan di mañan. No laga cinismo of indiferencia pone boso curason bira duro. Keda cordial cu otro a pesar di circunstacia dificil. Boso ta carga e luz aden. No solamente den palabra, pero den accion.”
E discurso a culmina cu un yamada fuerte pa renobacion moral:
“Laga nos scoge atrobe pa bon. Pa loke ta haci nos humano. Pa e forsa di amor bin riba miedo – y pa e confiansa cu nos hunto por traha un miho mundo.”