A institui Veiligheidshuis pa combati problema social y criminal

Veiligheidshuis ta un plataforma na unda diferente instancia di e cadena hudicial y di cuido, y partnernan manera enseñansa, ta traha hunto riba casonan compleho di problemanan social of criminal.

Despues di 5 aña di existencia, e cadena aki a demostra di ta sumamente valioso pa por yuda atende e problematica cu ta scondi tras di criminalidad, y tras di abuso y violencia domestico. Prome Minister Evelyn Wever-Croes como esun encarga di e "stuurgroep" aki, a ricibi e relato anual di 2023 di Veiligheidshuis, cu ta indica cu na aña 2023 tabata tin un total di 123 caso nobo, cu ta un cantidad basta consistente den ultimo añanan. Tambe, por a nota cu e casonan di violencia y abuso ta birando alarmante mescos cu adiccion y problemanan psikiatrico.

E plataforma aki ta consisti di varios instancia y departamento cu ta bin hunto cada dos siman
pa trata e casonan nobo y existente. E grupo di meta ta: hobennan cu ta na riesgo,
personanan cu problema mental, esnan cu tin problema mental y adiccion, abusadonan y victimanan den caso di abuso relacional, adultonan mayor, y esnan indocumenta. Unabes nan detecta un problema, nan ta tuma accion lihe pa asina evita cu hobennan, adultonan mayor of otro persona haya nan den crisis, cual lo rekeri hopi mas tempo, energia y placa pa soluciona.

Prome Minister ta sumamente satisfecho cu e trabou di Veiligheidshuis, y ta gradici señora Bernice Schulte, Procesmanager di Veiligheidshuis Aruba, y e ekipo completo pa nan dedicacion na yuda combati e problemanan serio aki.