A firma acuerdo pa fortifica y amplia e prome liña di cuido na Aruba

E ampliacion aki lo mehora e accesibilidad di dokternan di cas y esaki cu tempo ta traduci su mes den menos necesidad pa aseguradonan yega specialista.

Aña pasa na juni 2023, a firma un acuerdo di cuido (zorgakkoord) caminda a trece tur e actornan di cuido hunto y firma e acuerdo cu ta determina e direccion y futuro di cuido medico na Aruba. Un di e temanan mas importante den e acuerdo aki tawata e fortificacion di e prome liña di cuido y a formula e metanan cu ta bay traha riba dje den periodo 2024-2027 cualnan ta:

1.    Aumenta e cantidad di dokter di cas y baha e cantidad di asegurado pa dokter di cas;
2.    Crea mas cupo den e estudio di dokter di cas na Imsan; huisartsen opleiding;
3.    Amplia e cantidad di POH y ofrece e estudio completo;
4.    Inverti den formacion pa asistentenan di dokter di cas.

Den e acuerdo firma lo financia e estudio di POH pa e 27 POH'ers actual cu e modulonan, "cuido pa adulto mayor" y "promocion di salud".
Anteriormente a haci e modulonan di diabetes y cardiovascular. Tambe a amplia cantidad di POH cu 10 mas pa yega na un total di 38 POH'ers y e meta ta pa 2027 cada dokter di cas ta dispone di 0,7 fte di POH. Tambe lo amplia e coordinacion di e trabao di POH cu un coordinador mas y mehora e raportahe riba e trabaonan cu e POHnan ta realisa.

Gobierno ta gradici y felicita e team profesional di POH, AZV, HAVA y WGK, sin lubida tur esnan cu ta haci e acuerdo aki posibel. E vision di Ministerio di Salud Publico ta pa mehora
calidad di cuido y servicio. Inversion den cuido ta necesario pa por garantisa cu e fondo di AZV ta keda sostenibel y por keda ofrece e mesun pakete amplio di seguro na nos aseguradonan.