A duna total 639 permiso pa negoshi nobo den e prome 3 kwartaalnan di 2025
ORANJESTAD - Departamento di Asunto Economico, Comercio y Industria (DAECI) ta informa cu un total di 639 permiso di negoshi nobo a keda otorga durante e prome tres kwartaalnan di 2025, reflehando crecemento continuo den e actividad empresarial di Aruba y un proceso di permiso mas eficiente.
Entre juni y september 2025, DAECI a ricibi 872 peticion pa varios tipo di permiso di negoshi. Di esakinan, 382 peticion a keda procesa y aproba, 367 ta den tramite, y no por a procesa 123 pa falta di documento of pago.
Entre e permisonan aproba, 237 tabata pa negoshinan nobo. Esakinan ta inclui:
- 22 eenmanszaak;
- 46 filiaal;
- 166 VB;
- 3 NV.
E sectornan di negoshi mas comun entre permisonan nobo tabata actividadnan di real estate, compania chikito di paña, compania di construccion, kapsalon y salon di beyesa y houdstermaatschappij.
Pa e periodo di januari te cu september, a otorga un total di 639 permiso pa negoshi nobo:
- Kwartaal 1 - 201 permiso
- Kwartaal 2 - 201 permiso
- Kwartaal 3 - 237 permiso
Desde introduccion di e Vestigingsbeleid nobo na october 2022, e proceso di permiso pa negoshi a bira significantemente mas eficiente. E reformanan a reduci exigencianan innecesario, a introduci digitalisacion di henter e sistema di aplicacion, y a stimula actividad economico, particularmente den e centro di Oranjestad y San Nicolas. Meta di e vestigingsbeleid nobo ta tambe pa emiti permiso den un periodo di dos siman.
Ta encurasha empresarionan cu kier habri un negoshi of modifica un permiso di negoshi existente pa aplica digitalmente via e portal di DEACI.
Minister di Finansa, Asunto Economico y Sector Primario, Geoffrey Wever ta gradici e team di DAECI pa percura pa emiti e permisonan pa negoshi na un forma eficiente, lihe, como tambe pa compila tur informacion na un forma continuo riba e proceso di permiso pa negoshi.