A duna 402 permiso pa negoshi nobo den e prome 6 lunanan di 2025
ORANJESTAD – Ministerio di Finansas, Asunto Economico y Sector Primario ta informa cu den e periodo di april te cu juni 2025 a ricibi 634 diferente tipo di peticion.
Di e 634 peticion ricibi, a trata 245 peticion y a otorga e permiso relevante, 234 peticion ta den tramite, no por a trata 155 peticion pa falta di documento y of pago.
Di e 634 peticion ricibi y e permiso relevante otorga, 201 ta peticion pa permiso nobo den e periodo di mei te cu juni 2025.
Di e 201 permiso di negoshi nobo otorga:
- 27 tawata pa e eenmanszaak;
- 30 pa filial;
- 139 pa VBA;
- 3 pa NV;
- 2 pa un vennoot di un VOF.
E tipo di actividad comercial pa cual mas permiso nobo a otorga ta actividadnan di Real Estate, houdstermaaschappij, compania di construction, restaurant y otro tipo di local pa come, kapsalon y salon di beyesa. Pa e prome 6 lunanan di 2025 a un duna total di 402 permiso pa negoshi nobo. Pa habri un negoshi of haci cambio den e permiso pa negoshi segun ley, mester haci un peticion via e website di Departamento di Asuntonan Economico, Comercio y Industria (DAECI) y ta otorg’e bou di responsabilidad di Ministerio di Asunto Economico.
Desde a introduci e vestigingsbeleid nobo na october 2022 a percura pa acelera e proceso di otorgacion di permiso door di elimina diferente rekisito, digitalisa henter e sistema di peticion pa permiso y stimula diferente sectornan economico, inversion den centro di Oranjestad y San Nicolas, etc. Meta di e vestigingsbeleid nobo ta tambe pa emiti permiso den un periodo di dos siman.
Minister Geoffrey Wever ta gradici Departamento di Asunto Economico, Comercio E industria (DAECI) pa percura pa emiti e permisonan pa negoshi na un forma eficiente y lihe y tambe pa compila na un forma continuo tur informacion riba e proceso di permiso pa negoshi.
