A duna 241 permiso pa negoshi nobo den di cuater kwartaal di 2025
ORANJESTAD – Den e di cuater kwartaal di 2025, Aruba a sigui demostra un nivel halto di actividad economico y confiansa den iniciativa empresarial.
E desaroyo aki ta segun e ultimo reportahe di Vestigingsverordening Bedrijven (VVB) prepara door di Departamento di Asuntonan Economico, Comercio y Industria (DAECI). Departamento di Asuntonan Economico, Comercio y Industria (DAECI).
E datonan ta confirma cu interes pa establece negoshi y pa inverti den Aruba a keda fuerte na final di aña, a pesar di e diferente reto economico internacional.
Durante e periodo di october te cu december 2025, a ricibi un total di 1.311 peticion pa permiso di vestiging y otro cambio relaciona cu negoshi. Di esakinan, a trata 724 peticion y e permiso relevante otorga, mientras cu 508 peticion ta aun den proceso. No por a trata un total di 79 peticion pa motibo di falta di documento y of pago, segun e proceduranan vigente.
E mesun periodo a resulta den 1.225 vestigingsvergunningen (beschikkingen ministerial) firma, cu ta cubri tanto peticion nobo como petición entrega anteriormente. Di e total aki, 241 permiso tabata relaciona directamente cu e establecimento di negoshi nobo, loke ta subraya cu, te na final di 2025, iniciativa empresarial a sigui keda activo y resiliente.
A registra mayoria di e negoshinan nobo den forma di VBA, sigui door di eenmanszaak, filiaal y NV, loke ta mustra un patronchi claro di structuracion empresarial orienta riba crecemento y profesionalisacion. E sectornan mas representa entre e negoshinan nobo tabata horeca, construccion y instalacion tecnico, comercio (incluyendo e-commerce), houdstermaatschappij y servicio personal manera kapsalon y salon di beyesa.
Minister di Finansa, Asunto Economico y Sector Primario, mr. Geoffrey Wever, ta enfatisa cu e vestigingsbeleid nobo, introduci na october 2022, a sigui contribui structuralmente pa acelera e proceso di otorgacion di permiso, mediante eliminacion di diferente rekisito, digitalisacion di henter e proceso y un enfoke claro riba stimulacion di actividad economico, incluyendo inversion den centro di Oranjestad y San Nicolas.
Meta di e maneho aki ta pa emiti permiso den un periodo di dos siman, y e resultadonan di 2025 ta mustra progreso constante den e direccion aki.